Danııada parlament saılaýy ótip jatyr: Mette Frederıksen úshinshi ret premer bola ma
ASTANA. KAZINFORM – Danııada 24 naýryz kúni kezekten tys parlament saılaýy ótip jatyr. Sotsıal-demokratııalyq partııa jetekshisi, qazirgi premer-mınıstr Mette Frederıksen úshinshi merzimge qalýǵa talpynyp otyr, dep habarlaıdy Euronews.
Baqylaýshylardyń pikirinshe, saılaýdy merziminen buryn ótkizý týraly sheshim Frederıksenniń reıtıngi Grenlandııa tóńiregindegi saıası daýdan keıin ósken kezde qabyldanǵan. Negizi parlament saılaýy bıyl ótip, qazan aıynyń sońyna deıin uıymdastyrylýy tıis bolǵan.
Mette Frederıksen úkimetti shamamen jeti jyldan beri basqaryp keledi. 2022 jyldan beri eldi Sotsıal-demokratııalyq partııa, lıberaldyq «Venstre» jáne «Ýmerennye» partııalary qurǵan koalıtsııa basqarýda. Alaıda bul joly koalıtsııa parlamenttegi 179 orynnyń keminde 90-yna ıe bolyp, absolıýtti kópshilikke qol jetkize almaýy múmkin.
Sarapshylardyń aıtýynsha, qazirgi koalıtsııa quramynda premer-mınıstr laýazymyna úmitker bola alatyn birneshe saıasatker bar. Olardyń qatarynda qorǵanys mınıstri Trýls Lýnd Poýlsen («Venstre»), syrtqy ister mınıstri Lars Lekke Rasmýssen («Ýmerennye», buryn eki ret premer bolǵan) jáne oppozıtsııalyq Lıberaldyq alıans jetekshisi Aleks Vanopslah atalady.
Saýalnamalar nátıjesine qaraǵanda, naýryz aıynyń ortasynda solshyl partııalar blogy ońshyldardan sál alda bolǵanymen, eshbir saıası kúshtiń jeke ózi parlamentte basymdyqqa ıe bolýy ekitalaı. Sondyqtan jańa úkimet qurý úshin koalıtsııa kelissózderi qajet bolýy múmkin.
Saılaýaldy naýqanda Mette Frederıksen ózin daǵdarys kezinde senim artýǵa bolatyn saıasatker retinde tanystyrdy. Onyń urany – «Senýge bolatyn premer-mınıstr».
Sońǵy ýaqytta Grenlandııa máselesine baılanysty AQSh-pen aradaǵy shıelenis onyń bedelin arttyrǵanymen, qazir saılaýshylar nazarynda ekonomıka, baǵanyń ósýi, salyq, áleýmettik saıasat jáne kóshi-qon máseleleri tur.
Sotsıal-demokrattar saılaý baǵdarlamasynda bilim berý men áleýmettik qorǵaýdy qarjylandyrý úshin iri baılyqqa salyq engizýdi usyndy. Sonymen qatar kóshi-qon saıasatyn qatańdatýǵa baǵyttalǵan birqatar shara jarııalandy.
Danııa parlamenti – Folketıng 179 depýtattan turady. Onyń 175-i Danııa aýmaǵynda saılanady, al eki orynnan Grenlandııa men Farer araldaryna beriledi.
