Danııada áýe keńistigi drondar saldarynan qaıta jabyldy

ASTANA. KAZINFORM – 26 qyrkúıek, jumaǵa qaraǵan túni Danııanyń soltústigindegi Olborg áýejaıynyń mańyndaǵy áýe keńistigi aımaqta belgisiz ushqyshsyz basqarylatyn apparattar týraly habarlamaǵa baılanysty qysqa ýaqytqa jabyldy, dep habarlaıdy DW. 

FlightRadar24 reısterdi qadaǵalaý qyzmetiniń málimetinshe, shekteýlerge baılanysty Olborgqa baratyn kem degende eki reıs ushyp jetken joq. KL1289 reısi Amsterdamǵa oraldy, al Kopengagennen SK1225 reısi toqtatyldy.

Polıtsııa ókilderi keıinirek ushqyshsyz basqarylatyn ushý apparattary anyqtalmaǵanyn habarlady. Degenmen, bul Danııanyń áskerı bazasy ornalasqan Olborg mańynda belgisiz ushqyshsyz apparattar týraly habarlamalar shyqqan qatarynan ekinshi tún. 25 qyrkúıekke qaraǵan túni Olborg, Esberg jáne Sonderborg áýejaılary aýdanynda, sondaı-aq Skrıdstrýp áýe bazasynyń ústinde ushqyshsyz basqarylatyn apparattar baıqaldy. Olardyń barlyǵy elden shyǵyp úlgerdi, olardyń qaı jerden ushyrylǵany belgisiz.

Osydan eki tún buryn Kopengagen áýejaıynyń mańynda belgisiz ushqyshsyz drondar baıqalǵan. Oqıǵaǵa baılanysty áýejaı birneshe saǵat boıy shekteýlermen jumys istedi. Sol túni Norvegııanyń astanasy Oslodaǵy áýejaı belgisiz ushqyshsyz apparattar kesirinen jabyldy. 
Danııa úkimeti el áýejaılarynda jalǵasyp jatqan ushqyshsyz basqarylatyn apparattardyń ushýyn gıbrıdti shabýyldar retinde baǵalaıdy. Danııa premer-mınıstri Mette Frederıksen bul oqıǵany «Danııanyń búginde mańyzdy ınfraqurylymyna jasalǵan eń kúrdeli shabýyl» dep atady. Onyń aıtýynsha, bul sońǵy ýaqytta Eýropa áýejaılarynyń áýe keńistigin buzý jáne olarǵa jasalǵan kıbershabýyldar qataryna kirip otyr.

- Árıne, biz munyń artynda kim bolýy múmkin degen nusqany joqqa shyǵarmaımyz, - dep qosyp ótti premer-mınıstr.

Buǵan deıin Kopengagen men Oslo áýejaılarynda drondar saldarynan ondaǵan reıs keıinge shegerilgenin jazǵan bolatynbyz.