Danııada artqa salto jasaý boıynsha rekord ornatyldy
ASTANA. KAZINFORM — Danııanyń Orhýs qalasynyń eki turǵyny, Magne Steenberg Nılsen jáne Fılıp Vımmer Gross shekteýli ýaqyt ishinde eń kóp artqa salto jasaý boıynsha álemdik rekord ornatty, dep habarlaıdy AZERTADJ.
Agenttiktiń habarlaýynsha, Magne 12 saǵat 27 mınýt ishinde 1820 artqa salto jasap, burynǵy rekordty jańartty, al Fılıp 12 saǵattyq kategorııada rekord qoıdy.
Ekstremaldy fızıkalyq júkteme bulshyqettiń qatty aýyrsynýyna ákelgenimen, eki sportshy da nátıjeni sátti dep esepteıdi. Rekordty ornatý tek sporttyq maqsatpen ǵana emes, qaıyrymdylyq úshin de uıymdastyryldy. Onyń maqsaty — jergilikti Lystrup IF Gymnastik & Fitness sport klýbyna qarajat jınaý edi. Klýb 2025 jylǵy naýryzda alaıaqtyq qurbany bolyp, bir mıllıonnan astam kronnan aıyrylǵan.
Qarajat ár salto úshin jasalǵan qaıyrymdylyq jáne demeýshilik jarnalar arqyly jınaldy. Rekord Guinness rekordtar kitabyna usynyldy jáne qatysýshylar barlyq talaptyń saqtalǵanyna senimdi.
Budan buryn Norvegııada aıazda sýǵa shomylýshylar Gınnestiń jańa rekordyn ornatqany habarlandy.