Danııada álemdegi eń qymbat araq bótelkesi urlandy
ASTANA. QazAqparat - Baǵasy 1,3 mln dollar turatyn bótelke Kopengagen qalasyndaǵy «Kafe 33» barynan urlanǵan. Bul týraly atalǵan bardyń ıesi Brıan Ingberg TV-2 telearnasyna aıtqan.
Araqtar kollektsııasymen aınalysatyn Brıan Ingbergtiń aıtýynsha, ury úsh mınýttyń ishinde ǵımaratqa kirip, altyn men kúmisten jasalǵan salmaǵy alty keli turatyn «Rýsso-Balt» araǵynyń bótelkesin alyp ketken.
«Bul álemdegi eń qymbat araqtyń bótelkesi, meniń 1200 araq bótelkesinen turatyn kollektsııamnyń jaýhary bolatyn»,-dedi jýrnalısterge kollektsıoner.
Urlanǵan bótelke aq, qyzǵylt jáne sary altynnan jasalypty. Bótelkeni daıyndaýshy kompanııa ydystyń quramyna gaýhar qosylǵanyn da aıtqan.
