Danııada 8,8 mln adamnyń deregi hakerlerdiń qolyna tústi
ASTANA. KAZINFORM — Hakerler Danııanyń ortalyq halyq tizilimin buzyp, eldiń qazirgi jáne burynǵy 8,8 mln turǵynynyń derekterine qol jetkizgen. Bılik urlanǵan aqparatty paıdalanyp, alaıaqtyq jáne fıshıngtik shabýyldar jasalýy múmkin ekenin eskertti, dep habarlaıdy DW.
Danııanyń zertteý, bilim jáne tsıfrlandyrý mınıstri Krıstına Egelýnn bolǵan oqıǵany «asa kúrdeli jaǵdaı» dep atady. Onyń aıtýynsha, kıbershabýyldyń naqty aýqymy áli anyqtalyp jatyr.
Qaskóıler eldiń qazirgi jáne burynǵy turǵyndarynyń, sonyń ishinde qaıtys bolǵan jáne Danııadan kóship ketken azamattardyń aty-jónine, mekenjaılaryna jáne áleýmettik saqtandyrý nómirlerine qol jetkizgen.
Danııanyń CPR ortalyq halyq tiziliminde barlyǵy shamamen 11 mln adamnyń derekteri saqtalǵan. Qolda bar málimetke sáıkes, derbes derekteri arnaıy qorǵaýǵa alynǵan adamdardyń málimetteri kıbershabýyldan zardap shekpegen.
Tsıfrlandyrý mınıstrliginiń málimetinshe, halyq tizilimin basqaratyn organ júıede aqaý bar ekenin qyrkúıek aıynda-aq anyqtaǵan. Hakerler júıege Danııa kompanııalarynyń birine tıesili zańdy ruqsat arqyly kirgen. Keıin bul qoljetimdilik buǵattaldy.
Qazir bılik kıbershabýyldyń tolyq aýqymyn anyqtap, osyndaı shabýyldardyń qaıtalanýyna jol bermeý sharalaryn qabyldap jatyr. Tergeý bastaldy, alaıda kıbershabýyldy uıymdastyrýshylardyń kim ekeni ázirge belgisiz.
Krıstına Egelýnn el turǵyndaryn urlanǵan derekterdi paıdalanyp jasalýy múmkin fıshıngtik shabýyldarǵa baılanysty asa saq bolýǵa shaqyrdy.
— Bálkim, bireý bizben baılanysqa shyqqanda, ádettegiden de saq bolyp, kúmánmen qaraýymyz kerek shyǵar, — dedi mınıstr.
Ol sondaı-aq kúmándi jaǵdaılarda eshqandaı aqparat bermeýge jáne belgisiz siltemelerge ótpeýge shaqyrdy.
CPR tiziliminde Danııanyń qazirgi jáne burynǵy shamamen 11 mln turǵyny týraly málimet bar. Qazirgi ýaqytta el halqynyń sany shamamen 6 mln adamdy quraıdy.
Buǵan deıin AQSh-ta Pentagonnyń kadrlyq derekter ortalyǵyna jasalǵan kıbershabýyldan keıin 3 mln-ǵa jýyq adamnyń jeke málimetteri belgisiz qaskóılerdiń qolyna túskeni týraly jazǵan edik.
