Danııada 15 jasqa deıingi balalarǵa áleýmettik jelini qoldanýǵa tyıym salynady

ASTANA. KAZINFORM — Danııada el úkimeti áleýmettik jelilerdi paıdalaný úshin jas shekteýin engizýdi usyndy, dep jazdy DW.

— Áleýmettik jeliler dep atalatyn bul platformalar balalarymyzdyń ýaqytyn, balalyq shaǵyn jáne amandyǵyn urlaý arqyly órkendep keledi. Biz buǵan núkte qoıamyz, — dedi Danııanyń tsıfrlandyrý isteri jónindegi mınıstri Karolın Steıdj Olsen.

Mundaı málimdeme premer-mınıstr Mette Frederıksenniń balalardyń psıhıkalyq saýlyǵyna alańdap, áleýmettik jelige jas shekteý engizý jónindegi úndeýinen keıin jasaldy. Reuters agenttiginiń habarlaýynsha, parlamenttegi kópshilik partııalar bul bastamany qoldaýǵa nıetti.

Jańa ereje boıynsha, ata-analar 13 jasqa tolǵan balalarǵa keıbir onlaın-platformalarǵa kirýge ruqsat bere alady.

Danııada balalar arasynda eń tanymal áleýmettik jeliler — Snapchat, YouTube, Instagram jáne TikTok.

Zertteýlerge sáıkes, dat balalary áleýmettik jelilerde kúnine orta eseppen 2 saǵat 40 mınýt ýaqyt ótkizedi.

Eske sala keteıik, buǵan deıin Tájikstan balalarǵa 14 jasqa deıin áleýmettik jelini paıdalanýǵa tyıym salǵan bolatyn.

Aýstralııa Premer-mınıstri Entonı Albaneze eli álemde alǵash bolyp jasóspirimderge áleýmettik jelilerdi paıdalanýǵa tyıym salatynyn málimdedi. Ol áleýmettik jeliler balalarǵa tóndiretin qaýipterdiń «únemi ózgerip otyratynyn» atap ótken edi.

Sondaı-aq Túrkııada 16 jasqa tolmaǵandarǵa áleýmettik jelini paıdalanýǵa tyıym salyndy.