Danııa sýretshisi kartına salýǵa mýzeıden aqsha alyp, ornyna bos kenep bergen

Danııa soty sýretshi-kontseptýalıst Iens Haanıngti «Aqshany al da, qash» dep atalatyn bos kenepter qoıylǵan performans úshin Kýnsten murajaıyna aqsha qaıtarýdy mindettedi, dep habarlaıdy QazAqparat Euronews agenttigine silteme jasap. 

Iens Haanıng - kedeılik, teńsizdik jáne kóshi-qon týraly jumystarymen tanymal sýretshi-kontseptýalıst.

Kýnsten zamanaýı óner murajaıy sýretshini 2007 jylǵy eń tanymal jumystarynyń birin qaıta jasaý maqsatynda jaldady. Bul Danııa halqynyń tabysynyń belgisi retinde krondyq banknottarmen qaptalǵan kenepke salynǵan sýret bolýy tıis edi.

Alaıda avtor «oryndalǵan» tapsyrys retinde jurtshylyq nazaryna «Aqshany al da, qash» ataýymen eki úlken bos kenepti usynǵan.

Keıinnen olar kórmege qoıylyp, kelýshilerdiń úlken qyzyǵýshylyǵyna bólendi. Biraq murajaı Haanıngti kelisim-shart buzǵany úshin aıyptap, aqshany qaıtarýdy talap etti.

Sýretshi aqshany qaıtarýdan bas tartqanda, murajaı basshylyǵy sotqa júgindi.

Sot sheshimimen sýretshi murajaıǵa 67 myń eýro kólemindegi grantty qaıtarýy tıis. Degenmen, ol shamamen 3500 eýrony quraǵan qalamaqyny ózine qaldyrýǵa quqyly.

Danııalyq radıostansaǵa bergen suhbatynda Haanıng bul jumysy qatal eńbek jaǵdaıyna narazylyǵy ekenin aıtty. Ol jumysshylardy eńbek jaǵdaıy ózinikindeı aýyr bolsa, solaı jasaýǵa shaqyrdy. 

«Eger olardyń jumysy aýyr bolyp, jalaqy almasa, meniń keńesim: qolǵa túskenin alyp, qashyńyzdar», - dedi ol. 

Haanıngtiń bul jumysy - sýretshiler óner álemine jat emes absýrd, ekijúzdilikti atap kórsetken jumystar men performanstar tiziminiń bir bóligi.

2018 jyly sýretshi Benksıdiń «Shar ustaǵan qyz» atty týyndysy alǵash ret Sotheby's aýktsıonyna qoıylǵan edi. Sol kezde ony Eýropadan kelgen kollektsıoner 1,28 mln eýroǵa satyp alǵan.

Alaıda saýda sońynda kartına jaqtaýy týyndyny qıyp tastaıdy.

Jumystyń is júzinde joıylǵanyna qaramastan satyp alýshy kórsetilgen somany tólegen.