Danııa premer-mınıstri NATO-nyń joıylýy múmkin ekenin aıtty

ASTANA. KAZINFORM – Danııa premeri NATO-nyń joıylyp ketýi múmkin ekendigi týraly eskertý jasady.

Danııa premer-mınıstri Mette Frederıksen TV2 telearnasyna begen suhbatynda AQSh prezıdenti Donald Tramptyń Grenlandııany «basyp alý» josparyna mán bermeýge bolmaıtynyn aıtty, dep habarlaıdy Kazinfrom agenttiginiń menshikti tilshisi.

- AQSh Grenlandııaǵa qoqan-loqy jasamaýy kerek. AQSh arktıkalyq aralǵa shabýyldaıtyn bolsa, bári bir mezette toqtatýy múmkin, - dedi M.Frederıksen.

Buǵan qosa eger AQSh prezıdenti Donald Tramp Grenlandııaǵa basyp kirse, bul NATO-nyń jaǵdaıy bitti degendi bildiretin bolady, dep eskertti Danııa kóshbasshysy.

Danııanyń TV2 telearnasyna suhbatynda M.Frederıksen D.Tramptyń Arktıkadaǵy ózin-ózi basqaratyn Danııa aýmaǵyn basyp alý týraly málimdemesine qaraı, bul iske baıyppen qaraý kerektigin eskertti.

- Men sonymen qatar eger AQSh NATO-nyń ózge eline shabýyl jasaıtyn bolsa, halyqaralyq uıymnyń ózi de, soǵan qaraı Ekinshi Dúnejúzilik soǵys kezinen qamtamasyz etilip kele jatqan qaýipsizdiktiń de joq bolatynyn túsindirgim keledi, - dedi Frederıksen.

Aıta keteıik, Tramp paıdaly qazbalarǵa baı, ózin-ózi basqaratyn, soǵan qaramastan Danııanyń bólshegi sanalatyn, ıaǵnı, NATO alıansyna kiretin araldy qosyp alýǵa umtylyp keledi.

- Bizge Grenlandııa ulttyq qaýipsizdikke qaýip tóndirip otyrǵan jaǵdaı úshin kerek, - dedi Aq úı basshysy jeksenbi kúni prezıdent ushaǵynda jýrnalıstermen tildesý barysynda.

Tramptyń keıingi málimdemesi AQSh-tyń Venesýelaǵa soqqy jasap, onyń kóshbasshysy Nıkolas Madýrony tutqyndaǵannan keıin jasaldy.

Osyǵan deıin AQSh-tyń Venesýelada Nıkolas Madýrony ustaý operatsııasyn qalaı júrgizgeni týraly jazdyq.