Danııa mektepterde uıaly telefon qoldanýǵa tegis tyıym salady
ASTANA. KAZINFORM — Danııa oqýshylary mektepke kelgen kezde uıaly telefondaryn tapsyrýǵa májbúr bolady. Shekteý sabaq ýaqytynda ǵana emes, bilim berý uıymdarynyń búkil aýmaǵynda qoldanylady, dep habarlaıdy Kazinform agenttigi AZERTADJ-ǵa silteme jasap.
Danııa úkimeti mektepterde uıaly telefon qoldanýǵa tolyq tyıym salýdy josparlap otyr.
Jańa erejege sáıkes, oqýshylar mektepke kelgen kezde uıaly telefondaryn tapsyrýy kerek. Tyıym basqa da elektrondy qurylǵylarǵa qatysty bolady.
Alaıda buǵan qatysty erekshelikter qarastyrylǵan. Atap aıtqanda, medıtsınalyq kórsetilimder boıynsha qurylǵyny paıdalanýy qajet balalarǵa ruqsat beriledi.
Bul sheshim PISA halyqaralyq zertteýiniń nátıjeleri jarııalanǵannan keıin qabyldandy. Zertteý Soltústik Eýropa elderindegi bilim kórsetkishteriniń tómendegenin kórsetti.
Danııanyń bilim mınıstri Magnýs Hoınıke PISA derekterine sáıkes, mundaı shekteýler buryn engizilgen elderde oqýshylardyń sabaq kezinde alańdaýy azaıǵanyn aıtty.
Al Danııa premer-mınıstri Mette Frederıksen oqýshylardyń nátıjeleriniń tómendeýin balalardyń kúndelikti ómiriniń shamadan tys tsıfrlanýymen de baılanystyrdy.
— Biz, eresekter, balalar men jastardyń kúnine ekran aldynda tym kóp ýaqyt ótkizýine jol berdik, — dedi ol.
Shamamen bir jyl buryn dat saıasatkerleri uıaly telefonsyz mektepter qurý týraly kelisimge kelgen edi. Alaıda merziminen buryn saılaý jarııalanýyna baılanysty bul sharalar parlamentte bekitilmedi.
Endi úkimet osy bastamaǵa oralyp, mektepterde uıaly telefon qoldanýǵa tolyq tyıym engizýdi josparlap otyr.
Eske salaıyq, buǵan deıin Norvegııa Ǵylym jáne tehnologııa ýnıversıtetiniń jańa esebinde mektepterde mobıldi telefondardy paıdalanýǵa tyıym salý aıtarlyqtaı jaqsy nátıje bergeni aıtylǵan edi.
