Danııa kópshilik aldynda Quran órteýge tyıym salady
ASTANA. QazAqparat – Danııa bıligi qasıetti kitapty, onyń ishinde Quran, Іnjil nemese Torany kópshilik aldynda órteýge tyıym salady. Mundaı áreketke barǵandar eki jylǵa deıin bas bostandyǵynan aıyrylýy múmkin. Bul týraly búgin Danııanyń ádilet mınıstri Hýmmelgord málimdedi, dep habarlaıdy QazAqparat Deusche Welle basylymyna silteme jasap.
Onyń sózinshe, Qurandy órteý – danııalyqtardyń qaýipsizdigine shetelde bolsyn, el ishinde bolsyn qaýip tóndiretin jábirleý aktisi.
Danııa SІM basshysy Lars Lekke Rasmýssen bul sheshimdi mańyzdy belgi dep atady.
Osylaısha Danııa úkimeti musylman elderinde keıingi aılarda bolyp jatqan jappaı narazylyq sharalaryna jaýap berdi.
Bul sharalardyń keıbiri ekijaqty qarym-qatynasty ýshyqtyryp jibergen.
Qazirgi kúnge deıin Danııa pikir bildirý erkindigi qaǵıdatyn ustanyp, Qurandy órteý nemese osyǵan uqsas áreketterge tyıym salmaıtyn. Mundaı shekteý Shvetsııada da talqylanyp jatyr.
Danııa men Shvetsııadaǵy Quran órteý aktsııalary arab elderinde narazylyq týdyrdy.
Solardyń birinen keıin júzdegen narazy adam Baǵdad kóshelerine shyǵyp, Iraktaǵy Danııa elshiliginiń aldyna jınaldy.
Kúshtik qurylymdar jınalǵandardy sý atqyshpen taratty. Qashqyndarǵa kómek kórsetetin Dansk Flygtningehjælp gýmanıtarlyq uıymyna Irakta qarýly shabýyl jasaldy.
Danııa men Shvetsııada Quran nemese basqa da qasıetti kitaptardy órteý qylmystyq is sanalmaǵan.
2017 jyly Danııa parlamenti dinine til tıgizgeni úshin aıyptaýǵa bolatyn «Qudaıǵa til tıgizý babynyń» kúshin joıdy.
Degenmen rasıstik dep tanylǵan áreketter úshin jaza qarastyrylǵan, dep jazdy jýrnalıster.
