Danııa Qazaqstannyń koronavırýsty anyqtaý tájirıbesin negizge aldy
«Túrli elderdiń Densaýlyq saqtaý mınıstrleriniń qatysýymen ótken brıfıng barysynda Danııanyń Densaýlyq saqtaý mınıstri Qazaqstannyń tájirıbesin ózderine alǵanyn aıtqan bolatyn. Danııa ózinde dál sondaı mobıldi testileý ortalyǵyn ashty. Sonymen qatar vırýs belileri baıqalmaıtyn medıtsına qyzmetkerlerin de tekserip, testileýden ótkizedi. Demek, bizdiń tájirıbemizdiń ózge de eýropalyq elder alyp jatyr degen sóz», - dedi Serjan Aıdosov «Densaýlyq saqtaý mınıstrligi habarlaıdy» baǵdarlamasy barysynda.
Keshe Almaty qalasyna saparlaǵan Memleket basshysy Qasym-Jomart Toqaev koronavırýs indetin anyqtaýǵa arnalǵan jańa mobıldi skrınıng ortalyǵynyń qyzmetimen tanysqan bolatyn.
Sonymen qatar ol osydan birneshe kún buryn Dúnıejúzilik densaýlyq saqtaý uıymy Eýropalyq óńirlik bıýrosynyń dırektory Hans Klıýgeniń Belarýs, Qazaqstan, Ýkraına jáne Reseıdegi koronavırýsqa qatysty ahýalǵa alańdaýshylyq tanytqanyn buqaralyq aqparat quraldary jazǵanyn atap ótti.
«Biz brıfıng aıaqtalǵannan keıin óńirlik dırektor keńsesine habarlasyp, derekterdi aldyrdyq. Olarda eski statıstıka bolǵan jáne málimetter durys taldanbaǵany anyqtaldy. Hans Klıýge jaqyn dosymyz jáne ol 20 jyl buryn Shymkentte jumys istegen, densaýlyq saqtaý júıemizben jaqsy tanys», - dedi ol
Serjan Aıdosov Dúnıejúzilik densaýlyq saqtaý uıymy Eýropalyq óńirlik bıýrosynyń dırektory Hans Klıýge Qazaqstannyń koronavırýsqa qarsy kúres sharalaryna joǵary baǵa bergenin eske salyp ótti.
