Danııa Espaevany qoldaý maqsatynda úsh qalada avtojarys uıymdastyryldy

NUR-SULTAN. QazAqparat - «Aq jol» partııasynan prezıdenttikke úmitker Danııa Espaevany qoldaý úshin elimizdiń iri qalalary Nur-Sultan, Almaty jáne Shymkentte avtojarys ótti, dep habarlaıdy QazAqparat shtabtyń baspasóz qyzmetine silteme jasap.

Sharany uıymdastyrýshy - Danııa Espaevanyń saılaýaldy shtaby. Aktsııaǵa barlyǵy júzdegen avtokólik qatysty.

Elordada 30 aq tústi mashınadan turatyn tizbek óz jolyn Máńgilik el dańǵylyndaǵy «Aq jol» partııasynyń keńsesinen bastady. Uıymdastyrýshylardyń sózinshe, mashınalardyń aq tústi bolýy beker emes, ol «Aq jol» partııasynyń ataýymen tikeleı baılanysty.

Ár kólik Qazaqstandaǵy tuńǵysh áıel úmitkerdi qoldaýǵa baǵyttalǵan jalaýsha, úgit belgilerimen bezendirildi. Kólik júrgizýshileriniń marshrýty elordanyń ortalyq kósheleri, kópir, dańǵyldardy qamtydy. Jalpy alǵanda, aktsııa qatysýshylary júzdegen shaqyrymdy júrip ótti.

Osyndaı avtojarys Almaty men Shymkent megapolısterinde de ótti.