Danııa Espaeva: Parlamenttik oppozıtsııa týraly zań jobasy – demokratııany nyǵaıtý úshin jasalǵan qadam

NUR-SULTAN. QazAqparat – Búgin Májilistiń jalpy otyrysynda «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Konstıtýtsııalyq zańynyń jobasy maquldandy. Osyǵan oraı QazAqparat tilshisi Parlament Májilisiniń depýtaty Danııa Espaevadan zań jobasyna qatysty pikirin bilgen bolatyn.

«Zań jobasyn «Aq jol» partııasy usyndy. Biraz jyl buryn biz osy qujatty Úkimettiń qaraýyna bergen edik. Sodan beri ol EQYU baǵalaýynan ótti. Byltyr kúzde Memleket basshysy Qasym-Jomart Toqaev Ulttyq keńestiń otyrysynda Parlamenttiń kóppartııaly bolýyn aıta kele oppozıtsııa týraly zań jobasyn ázirleý kerektigin júktegen bolatyn. Osyǵan oraı, bizdiń partııa tarapynan ázirlengen osy zań jobasyn Májilistiń qaraýyna engizdik. Búgingi otyrysta sol zań jobasy maquldanyp, Senatqa joldandy», - dedi QazAqparat tilshisine Danııa Espaeva.

Májilismen atalmysh zań jobasyna parlamenttik oppozıtsııa túsinigi engizilgenin eske saldy.

«Qazirgi tańda Parlament Májilisinde 7 komıtet bar. Osy komıtetterdiń biriniń tóraǵalyǵyn parlamenttik oppozıtsııaǵa berý mindetti bolyp otyr. Sonymen qatar komıtet hatshylyǵynyń eki orny da parlamenttik oppozıtsııa múshelerine beriledi. Meniń oıymsha bul aıtarlyqtaı alǵa jasalǵan qadam. Batys elderinde máselen bıýdjet týraly zań jobasyn, bıýdjet bólinisin kóbinese oppozıtsııalyq partııa qaraıdy. Sol sebepti búgingi engizilgen normanyń mańyzy óte zor dep esepteımin. Jalpy bizdiń eldegi demokratııany nyǵaıtý baǵytynda jasalǵan qadam dep oılaımyn.Bul – tarıhı sát. Sebebi Qazaqstanda alǵash ret parlamenttik oppozıtsııa týraly zań jobasy qabyldanǵaly otyr», - dedi ol.

Eske sala ketsek búgin Májilis Parlamenttik oppozıtsııaǵa kepildik beretin qadamdardy maquldaǵany týraly habarlaǵan bolatynbyz.

Foto: www.parlam.kz