Danııa Espaeva memlekettik medıtsınalyq nysandardy arzanǵa satý faktileri jaıynda aıtty
«Aq jol» fraktsııasy depýtattyq saýaldarda densaýlyq saqtaý júıesindegi jekeshelendirýdi birneshe ret synǵa aldy. Biz klınıkalardy tómen baǵamen satýǵa nemese jańa ıeler obekt úshin memlekettiń ózinen kepildendirilgen tólemder esebinen eseptesip, olardy keıinnen satyp alý arqyly senimdi basqarýǵa berýge qarsy boldyq. Mundaı format sybaılas jemqorlyq táýekelderiniń joǵary dárejesin jáne is júzinde áleýmettik nysandardy «qajetti adamdarǵa» taratýdy kózdeıdi», - dedi D. Espaeva QR Premer-Mınıstriniń orynbasary Eraly Toǵjanovtyń atyna joldaǵan saýalynda.
Onyń aıtýynsha, 2017 jyldan bastap 5 depýtattyq saýal joldanǵan, onda naqty mysaldar keltirildi. Atap aıtqanda, bul Almaty oblysyndaǵy Talǵar aýdandyq aýrýhanasyna, Pavlodar oblystyq dıagnostıkalyq ortalyǵyna qatysty boldy. Mysaly, aýdany 7 000 sharshy metrden asatyn jáne barlyq jabdyqtary bar atalǵan ortalyq sharshy metrine 44 myń teńge baǵamen satyldy.
«Almaty qalasyndaǵy balalar stomatologııalyq klınıkasy qalalyq qoǵamdyq densaýlyq basqarmasy basshysynyń aǵasyna satyldy. Klınıkanyń esep shotynda 170 mln teńge bola tura jáne jyl saıynǵy bıýdjettik qarjylandyrý 260 mln teńgeni qurasa da, alǵashqy jarna 92 mln teńgeni qurady. Munyń bárin jekeshelendirý dep ataýǵa bolmaıdy, bul taza «jaýlaý». 2017-2020 jyldary barlyǵy 124 klınıkany jekeshelendirý josparlanǵan bolatyn. Memleket nemese qoǵam budan qandaı paıda tapty – bul biz úshin de qupııa. Jekeshelendirýdiń 2021-2025 jyldarǵa arnalǵan Keshendi josparyna sáıkes, taǵy 700 memlekettik kásiporyn jekeshelendirýge jatady, olardyń ishinde medıtsınalyq obektiler de bar», - dedi depýtat.
Onyń sózine qaraǵanda, 2021 jylǵy 12 qazandaǵy «Deni saý ult» ulttyq jobasy aıasynda memlekettik-jekeshelik áriptestik (MJÁ) tetigi boıynsha 20 iri kópbeıindi aýrýhana salý kózdelgen.
«Keshe sybaılas jemqorlyqqa qarsy is-qımyl keńesinde Prezıdent memlekettik-jekeshelik salasynda sybaılas jemqorlyqqa qarsy baqylaý qajettigin atap ótti. Ony júzege asyrýǵa barlyq negiz bar. «Qazaqstandyq MJÁ ortalyǵy» saıtyna sáıkes josparlanǵan medıtsınalyq nysandardyń jalpy quny shamamen 3 trln teńgeni quraıdy. (2 trln. 950 mlrd. teńge). Eger memlekettik klınıkalar eń kóp degende 300-500 mln teńgege satylsa jáne sırek jaǵdaılarda – 1-1,5 mlrd teńgege satylsa, al, ádette, senimgerlikpen basqarý túrimen «syıǵa tartylsa», onda olardyń ornyna jańa klınıkalarǵa bıýdjetten júzdegen mıllıard teńge jumsalady», - dedi D. Espaeva.
Máselen, Túrkistan qalasyndaǵy kópbeıindi aýrýhananyń operatsııalyq shyǵyndaryn, ınvestordyń syıaqysyn jáne kredıtter boıynsha paıyzyn eskere otyryp, 570 orynnyń ınvestıtsııalyq shyǵyndary 480 mlrd teńgeni quraıdy. «Astana medıtsına ýnıversıteti» KEAQ janyndaǵy 800 oryndyq Birikken ýnıversıtet aýrýhanasyn salýǵa jáne paıdalanýǵa beriletin tólemder 900 mlrd teńgege deıin jetedi.
Joǵaryda aıtylǵandarǵa baılanysty «Aq jol» depýtattyq fraktsııasy kelesilerdi suraıdy:
1) Jekeshelendirilgennen nemese senimgerlik basqarýǵa berilgennen keıin, bul mekemeler memleketten qansha qarajat alǵanyn habarlaý.
2) MJÁ aıasynda jańa medıtsınalyq nysandar boıynsha qurylysqa, qyzmet kórsetýge, basqarýǵa, operatsııalyq shyǵyndarǵa jáne paıyzdardy tóleýge qansha memlekettik qarajat josparlanǵanyn habarlaý.
3) Qoǵamǵa qazirgi klınıkalardy tómen baǵada berýdiń jáne jańa nysandardy trıllıondap qarjylandyrýdyń mánin, osy shemalardyń túpki benefıtsıary kim ekenin túsindirý.
4) Halyq pen memlekettiń múddelerine tikeleı qysym jasalǵan jaǵdaıda, qalyptasqan kózqarastardy synı turǵydan qaıta qaraý qajet.