Danııa Espaeva bıýdjet jóninde: 2027 jyldyń bastapqy kezeńi áli de kúrdeli
ASTANA. KAZINFORM — Búgin Quryltaıda 2027-2029 jyldarǵa arnalǵan respýblıkalyq bıýdjet jobasy tanystyryldy. Osy oraıda Quryltaı vıtse-spıkeri Danııa Espaeva 2027 jyldyń bastapqy kezeńi áli de kúrdeli kúıinde qalyp otyrǵanyn aıtty.
- Búgin biz 2027-2029 jyldarǵa arnalǵan respýblıkalyq bıýdjet jobasyn qaraımyz. Jańadan qurylǵan Quryltaı úshin bul – birinshi bıýdjettik kezeń jáne eń jaýapty zańnamalyq protsesterdiń biri desek artyq bolmaıdy. Bıýdjetti qaraý kezinde qabyldanatyn sheshimder eldiń damýyn úshjyldyq kezeńnen áldeqaıda uzaq ýaqytqa aıqyndaıtyn bolady. Infraqurylym, memlekettik ınvestıtsııalar, qaryz mindettemeleri, áleýmettik baǵdarlamalar, Ulttyq qor boıynsha sheshimder aldaǵy uzaq jyldarǵa áserin tıgizedi. Sondyqtan, bizdiń mindetimiz – bıýdjet jobasyn barynsha tereń, kásibı turǵydan jáne jaýapkershilikpen qaraý. Quryltaıǵa jańa Bıýdjet kodeksinde kózdelgen edáýir kólemdi materıaldar usynyldy. Bul bizge tikeleı kirister men shyǵystardy ǵana emes, odan da keńirek – búkil memlekettik qarjy júıesiniń turaqtylyǵyn baǵalaýǵa múmkindik beredi. Joǵary aýdıtorlyq palatanyń qorytyndysyn erekshe atap ótkim keledi, - dedi D. Espaeva.
Onyń aıtýynsha, Joǵary aýdıtorlyq palatanyń usynylǵan qorytyndysynda shynaıy makroekonomıkalyq alǵy sharttardan bastap ınvestıtsııalyq josparlaý sapasyna deıingi eleýli máseleler kóterilgen.
- Sondyqtan bizdiń mindetimiz – aldyn ala qalyptasqan pozıtsııany rastaý emes, dálel-dáıekterdi, esep-qısaptar men naqty derekterdi salystyrý. Bıýdjet jobasynda mańyzdy másele kóterilip otyr. 2027–2029 jyldar tapshylyqty azaıtý jáne munaı qarajatyna táýeldilikti birtindep tómendetý arqyly neǵurlym qatań bıýdjettik baǵytqa kóshý kezeńi retinde málimdelgen bolatyn, alaıda 2027 jyldyń bastapqy kezeńi áli de kúrdeli kúıinde qalyp otyr, - dedi vıtse-spıker.
Onyń sózine qaraǵanda, Quryltaıdyń maqsaty – máseleni tek synaý emes, ony anyqtap, sheshýge úles qosý. Kásibı Quryltaıdyń baqylaýy odan da keńirek bolǵany abzal – eger bir máseleni kóterilse, ony sheshýdiń yqtımal joldaryn da usynǵan jón.
- Úkimetten de osyndaı jumys tásilin kútemiz. Depýtattardyń kúrdeli nemese qolaısyz suraqtaryn qarsylyq retinde qabyldamaý kerek. Eger depýtattarda esepteýlerge, shyǵystardyń tıimdiligine nemese kórsetkishterge qol jetkizýge qatysty kúmán týyndasa, biz buǵan tushymdy jaýap kútemiz, ıaǵnı nelikten dál osyndaı sheshim qabyldandy, qandaı balama joldary bar, qandaı nátıje kútiledi jáne ol úshin kim jaýap beredi? Birinshi oqylymǵa deıin biz makroekonomıkalyq alǵysharttar men bıýdjettiń kirisin, Ulttyq qordy, tapshylyq pen memlekettik qaryzdy, ortalyq memlekettik organdardyń shyǵystaryn, memlekettik ınvestıtsııalardy, bıýdjetaralyq qatynastardy, kvazımemlekettik sektordy, bıýdjetten tys qorlardy jáne memlekettik qarjynyń turaqtylyǵyna áser etetin basqa da máselelerdi júıeli túrde qarastyramyz, - dedi Danııa Espaeva.
Jaqynda úsh jyldyq bıýdjet jobasy Quryltaı qaraýyna engizilgenin jazǵan edik.
