Danııa EO tóraǵalyǵy kezinde balalardy tsıfrlyq ortada qorǵaýǵa basymdyq beredi
ASTANA. KAZINFORM — Aldaǵy alty aı ishinde Danııa Eýropalyq Odaq Keńesine tóraǵalyq etetin bolǵandyqtan, EO iri tehnologııalyq kompanııalardyń yqpalyn shekteýdi jáne eń aldymen balalar men jasóspirimderdi tsıfrlyq ortada qorǵaýdy kózdep otyr.
AZƏRTAC agenttiginiń habarlaýynsha, osy aptada qyzmetine resmı kirisken Danııa úkimeti eýropalyqtardyń, ásirese jastardyń tehnologııamen ózara árekettesý tásilin ózgertýi múmkin órshil zańnamalyq kún tártibin basty basymdyq retinde belgilegen.
— Balalar men jastardy zııandy onlaın-kontentten, táýeldilik týdyratyn algorıtmder men olardyń derekterin jappaı jınaýdan qorǵaý — bizdiń kún tártibimizdegi mańyzdy másele, — delingen Danııanyń tóraǵalyq etý baǵdarlamasynda.
Bul shyn máninde ónimderdiń táýeldilik týdyratyn fýnktsııalaryn qaıta jobalaýdy jáne jasty tekserýdiń áldeqaıda qatań júıesin engizýdi talap etýge jol ashady.
Sonymen qatar, EO jasandy ıntellektini de qadaǵalaýǵa umtylyp otyr. Bul rette avtorlyq quqyqty saqtaý máselesine erekshe nazar aýdarylady.
Bıylǵy kúzde Eýropalyq Odaq óz tarıhyndaǵy eń daýly zańdardyń biri boıynsha túpkilikti sheshim qabyldaýy múmkin. Kún tártibinde — WhatsApp, Instagram, Google jáne TikTok sııaqty iri platformalarǵa paıdalanýshylardyń jeke jazbalaryn pedofılııaǵa qatysty derekterge tekserý talaby tur. Árıne, bul tek sot sheshimi negizinde júzege asyrylmaq. Maqsat — Eýropa Keńesiniń málimetinshe, EO-daǵy ár besinshi balany qamtıtyn bul aýyr problemaǵa qarsy turý.
Atalǵan usynys 2023 jyly Eýroparlament tarapynan maquldanǵanymen, Germanııa men Nıderland sııaqty negizgi múshelerdiń qatań qarsylyǵyna baılanysty eki jylǵa jýyq toqtap tur.
Keıbir memleketter kámeletke tolmaǵandardy qorǵaýdyń atyn jamylyp, jappaı baqylaýǵa esik ashady jáne shıfrlaý prıntsıpin, qaýipsiz onlaın baılanystyń negizin buzady dep qorqady.
Mundaı shıfrlaý WhatsApp syndy qosymshalar arqyly jiberiletin habarlamalardy tek jazysqan taraptar ǵana kóre alatyn etýge múmkindik beredi — bul tipti servıs ıesiniń de oǵan qol jetkize almaýyn qamtamasyz etedi.
Danııanyń EO-daǵy tóraǵalyǵy osy tyǵyryqtan shyǵýdyń jolyn taýyp, ortaq kelisimge kelýdi kózdep otyr. Kúntizbede qyzylmen belgilengen kún — 14 qazan, dál osy kúni eýropalyqtardyń «qupııa» bolashaǵyn anyqtaıtyn pikirtalas qaıta bastalady. Maqsat — áleýmettik jelilerdi paıdalaný úshin eń tómengi jas shegin, mysaly, 15 jasty bekitip, platformalardy ony mindetti túrde saqtaýǵa májbúr etý.
Aıta ketelik Nıderland bıligi 15 jasqa deıingi balalarǵa áleýmettik jelilerdi paıdalanýǵa tyıym salýdy usynǵan edi.