Danııa bıligi vırýs taratýy múmkin degen qaýippen qarakúzenderdi qyryp jatyr

Olar 17 mln qarakúzendi qyryp tastamaq. Danııa úkimetiniń bul sheshimi týraly osy eldiń Premer-Mınıstri Mette Frederıksen málim etti, dep habarlaıdy QazAqparat Euronews portalyna silteme jasap.

Ondaǵy derekterge qaraǵanda, koronavırýs qarakúzender arasynda mýtatsııalanyp, artynan vırýs adamdarǵa juqqan.

Danııanyń Densaýlyq saqtaý organdarynyń málimetterine qaraǵanda, koronavırýstyń mýtatsııalanǵan Sars-CoV-2 nusqasy Soltústik ıÝtlandııada 12 adamnan anyqtalǵan. Onyń qaýiptiligi sonda, osy ýaqytta daıyndalyp jatqan vaktsınanyń áserin álsiretip, vırýstyń Danııanyń ózge aýdandaryna jáne búkil Eýropaǵa taraýyna yqpal etýi yqtımal.

Danııa qarakúzen terisin óńdeýshi iri memleketterdiń biri. Osy ýaqytta elde myńnan astam qarakúzen ósiretin sharýashylyqtar bar. Danııa bıliginiń dereginshe, koronavırýs ınfektsııasyn juqtyrý jaǵdaılary 200-den astam fermada anyqtalǵan. Olardyń úshten birinde janýarlar tolyǵymen joıylǵan. Qarakúzen óndirýshilerge ótemaqy tólenedi.

Maýsym aıynda aýrýdyń taraýy shegine jetken kezde Nıderland bıligi terisi ádemi ańdardyń barlyǵyn joıý jóninde sheshim shyǵarǵan.

Osyǵan deıin Danııanyń veterınarlyq qyzmetiniń mamandary qarakúzenderdi qyrýǵa kiriskeni habarlanǵan bolatyn.