Danııa bes kúnge azamattyq drondardyń ushýyna tyıym saldy

ASTANA. KAZINFORM – Kopengagende ótetin Eýropalyq odaq sammıtiniń qarsańynda Danııa bıligi el aýmaǵynda azamattyq ushqyshsyz ushý apparattarynyń (drondar) ushýyna ýaqytsha tyıym saldy, dep habarlaıdy DW.

Eldiń Kólik mınıstrligi 28 qyrkúıekte málimdegendeı, qaýipsizdik sharasy 29 qyrkúıekten bastap 3 qazanǵa deıin qoldanylady. Bul sheshim sońǵy kúnderi eldegi birneshe áýejaı mańynda drondardyń jıi baıqalýyna baılanysty qabyldandy.

Danııa kólik mınıstri Tomas Danıelsenniń aıtýynsha, drondardyń qoǵamdyq turaqtylyqqa qaýip tóndirip, belgisizdik týǵyzýyna jol bermeý qajet.

«EO sammıtin ótkizý kezinde qaýipsizdik máselelerine erekshe nazar aýdarylýy tıis», – dedi ol.

22 qyrkúıek kúni keshke Kopengagen áýejaıynda drondar saldarynan áýe qatynasy birneshe saǵatqa toqtatyldy. Keıin olar Olborg, Esberg jáne Sennerborg áýejaılarynyń mańynda, sondaı-aq Karýp pen Skrıdstrýp áskrı bazalary ústinde baıqalǵan.

Qorǵanys mınıstrliginiń dereginshe, sońǵy ret 28 qyrkúıek kúni túnde birneshe áskerı nysan janynan drondar kóringen.

Danııa premer-mınıstri Mette Frederıksen bul jaǵdaıdy «gıbrıdti shabýyldar» dep atady.

Sarapshylar men buqaralyq aqparat quraldary Reseıdiń yqtımal qatysy baryn joqqa shyǵarmaıdy. Alaıda Máskeý bul aıyptaýlardy teriske shyǵardy.

1 qazan kúni Kopengagende beıresmı EO sammıti ótedi, al kelesi kúni Eýropalyq saıası qaýymdastyq sammıti uıymdastyrylady. Oǵan Germanııa kantsleri Frıdrıh Merts te qatysady. Qaýipsizdikti kúsheıtý maqsatynda Germanııa Danııa ótinishi boıynsha Kopengagenge áskerı kúsh jibermek.

Aıta keteıik, buǵan deıin Danııada áskerı nysandardyń ústinen drondar baıqaldy.