Danııa AstraZeneca vaktsınasyn qoldanýdy toqtatty
NUR-SULTAN. QazAqparat – Danııa bıligi tromb paıda bolýy múmkin degen qaýppen AstraZeneca vaktsınasyn qoldanýdan bas tartý týraly sheshim qabyldady. Ol vaktsınany halyqtyń barlyq toptaryna egýge tyıym salǵan Eýropadaǵy aǵashqy el boldy, dep habarlaıdy QazAqparat BBC-ge silteme jasap.
Danııa bıligi málim etkendeı, zertteýler nátıjesinde atalmysh preparatpen vaktsına jasalǵannan keıin tromb paıda bolýy jıiligi joǵary bolǵan. Danııada AstraZeneca vaktsınasynyń barlyǵy 2,4 mln dozasy qoldanystan alynyp tastalady.
Danııa Densaýlyq saqtaý basqarmasynyń bastyǵy Soren Brostrem bul sheshim ońaıǵa soqpaǵanyn aıta kelip, degenmen elde basqa da vaktsınalardyń bar ekenin, Danııadaǵy epıdemııanyń qazirgi kezde baqylaýda ekenin alǵa tartty.
«Vaktsınalaýǵa kezekte turǵan halyqtyń kelesi toptarynyń aýyr formada aýyrý qaýpi az. Olarǵa neniń qaýiptirek ekenin tarazylaý kerek. COVID-19 nemese az bolsa da, aýyr keri áser qaýpi bar AstraZeneca vaktsınasy»,-dedi ol.
Osy jaǵdaıǵa baılanysty Danııadaǵy vaktsınalaý baǵdarlamasy birneshe aptaǵa shegerilýi múmkin.
Aldyńǵy aptada Eýropalyq dári-dármek agenttigi (EMA) AstraZeneca vaktsınasynyń qan uıyǵy paıda bolýymen múmkin baılanysy týraly habarlaǵan. Sonymen qatar COVID-19-dan qaıtys bolý qaýpi kóbirek ekeni de aıtyldy. Eýropanyń birneshe eli bul vaktsınany paıdalanýdy qysqa ýaqytqa toqtatyp, keıinnen ony tek joǵary jas sanatyndaǵy adamdardy vaktsınalaý úshin ǵana qaıta qosty.
Sársenbi kúni AQSh, Kanada jáne Eýroodaq Johnson & Johnson farmatsevtıkalyq kompanııasy jasaǵan vaktsınany paıdalanýdy toqtatty, munyń da sebebi – qan uıyǵynyń paıda bolý qaýpimen baılanysty.
Olardan keıin Ońtústik Afrıka eli de ońtústik afrıkalyq shtamǵa jaqsy áser etetinine qaramastan, Johnson & Johnson vaktsınasynyń qoldanysynan bas tartty. Eki jaǵdaıda da vatsınalaýdan keıin qan uıyǵynyń paıda bolýy – sırek kezdesetin jaǵdaı.
DDU EO-nyń vaktsınalaý baǵdarlamasyn synǵa aldy. Taǵy osyndaı kezekti kidiris ári qaraı alasapyranǵa ákelýi múmkin.
Búgingi kúni Danııada mıllıonǵa jýyq adam vaktsına aldy, olardyń 150 myńyna AstraZeneca vaktsınasy egildi. Odan bólek elde Pfizer/BioNtech jáne Moderna vaktsınalary qoldanysta.
