Danııa armııasy AQSh-tyń Grenlandııaǵa yqtımal aralasýyna dereý jaýap bere alady

ASTANA. KAZINFORM — Eger AQSh Danııa Koroldiginiń quramyndaǵy Grenlandııaǵa áskerı ınterventsııa jasaıtyn bolsa, Danııa armııasy arnaıy áskerı nusqaýlardy kútpesten birden jaýap qaıtarýǵa qabiletti, dep habarlaıdy Anadoly.

Dattyń Berlingske basylymy qoǵam nazaryna Ekinshi dúnıejúzilik soǵystan keıin, 1952 jyly qabyldanǵan sheshimdi usyndy. Bul sheshim Danııa armııasynyń tosyn jaǵdaıǵa tap bolmaýy úshin qabyldanǵan. Qujat AQSh prezıdenti Donald Tramptyń Grenlandııaǵa qatysty málimdemelerinen keıin qaıtadan ózekti boldy.

Atalǵan sheshimge sáıkes, ulttyq aýmaqqa shabýyl jasalǵan jaǵdaıda, Danııa qarýly kúshteri soǵys resmı túrde jarııalanbasa da, joǵarydan buıryq kútpeı-aq áreket ete alady.

Qujatta sondaı-aq danııalyq áskerı qyzmetshilerdiń «jaý qolyna túsken nemese ózge sebeptermen qatardan shyǵarylǵan ofıtserlerdiń buıryqtaryna baǵynbaýy tıis» ekeni kórsetilgen.

Tramptyń Grenlandııa týraly málimdemesi

AQSh prezıdenti Donald Tramp strategııalyq mańyzy bar Grenlandııada Reseı men Qytaıdyń yqpaly artyp kele jatqanyn alǵa tartyp: Ulttyq qaýipsizdik turǵysynan bizge Grenlandııa qajet, — dep málimdedi.

Sondaı-aq ol AQSh-tyń Grenlandııany baqylaýy Batystyń keń aýqymdy múddelerine qyzmet etetinin jáne qaýipsizdik turǵysynan Eýropalyq odaqqa da qajet ekenin atap ótti.

Aıta keteıik, Danııanyń avtonomdy aımaǵy bolyp sanalatyn Grenlandııa buǵan deıin AQSh-tyń egemendikti berý jónindegi usynystaryn qabyldamaǵan.

Budan buryn AQSh áskerıleri Grenlandııany satyp alýy múmkin degen aqparat tarady.

Keıinnen AQSh Memlekettik hatshysy Marko Rýbıo zań shyǵarýshylarǵa prezıdent Donald Tramptyń Grenlandııany basyp alýdy emes, satyp alýdy josparlap otyrǵanyn habarlady.