Danııa AQSh vıtse-prezıdentiniń Grenlandııaǵa saparyna reaktsııa bildirdi
ASTANA. KAZINFORM — Danııa Syrtqy ister mınıstri Lars Lekke Rasmýssen AQSh ákimshiligin el men Grenlandııany synaǵany úshin renishin bildirip, Kopengagen Arktıka qaýipsizdigine kóbirek ınvestıtsııa salyp jatqanyn jáne AQSh-pen tyǵyz yntymaqtastyq úshin ashyq ekenin málimdedi.
28 naýryz, juma kúni Pıtýffık ǵarysh bazasyna barǵan kezde Dj. D. Vens AQSh áskerine Danııanyń Grenlandııanyń qaýipsizdigine «az qarjy jumsap jatqanyn» málimdep, Kopengagennen kózqarasyn ózgertýdi talap etti.
Jaýap retinde Danııanyń syrtqy ister mınıstri Tramp ákimshiligin synap, onyń eli Arktıka qaýipsizdigine jetkilikti ınvestıtsııa salyp jatqanyn málimdedi.
Bul týraly Lars Lekke Rasmýssen áleýmettik jelide jarııalanǵan beınerolıkte málimdedi.
— Kóptegen aıyptaý men pikir aıtyldy. Árıne, biz synǵa ashyqpyz, — dedi Rasmýssen, — Biraq ashyq bolýǵa ruqsat etińiz: biz munyń qandaı únmen berilgenin quptamaımyz. Jaqyn odaqtastarmen bulaı sóılespeıdi. Men áli kúnge deıin Danııa men AQSh-ty jaqyn odaqtastar dep sanaımyn.
Lekke Rasmýssen óziniń beınejazbasynda Danııa men AQSh arasyndaǵy 1951 jylǵy qorǵanys kelisimin eske saldy. Onyń aıtýynsha, 1945 jyldan beri Grenlandııadaǵy amerıkalyq ásker sany qysqardy. Soltústik-batystaǵy shalǵaıdaǵy Pıtýffık ǵarysh bazasynda búginde 200-ge jýyq ásker qaldy.
— 1951 jylǵy kelisim «Qurama Shtattaryna Grenlandııadaǵy áskerı qatysýyn aıtarlyqtaı arttyrýǵa keń múmkindik berip otyr, — dep málimdedi syrtqy ister mınıstri, — Eger qalasańyz, ony talqylaıyq.
L.Rasmýssen Danııanyń Arktıka qorǵanysyna óz ınvestıtsııasyn kóbeıtkenin atap ótti.
Mysaly, qańtarda Kopengagen úsh jańa áskerı keme, alys qashyqtyqqa ushatyn ushqyshsyz ushaqtar men spýtnıkterdi qosa alǵanda, Arktıka qaýipsizdigin qamtamasyz etýge 14,6 mlrd dat kronyn (1,9 mlrd eýro) bóletinin jarııalady.
— Danııaǵa joldaýymyz óte qarapaıym: siz Grenlandııa halqy úshin jaqsy jumys jasaǵan joqsyz. Siz Grenlandııa halqyna jáne keremet adamdarǵa toly osy ádemi jerdiń qaýipsizdik sáýletine jetkilikti ınvestıtsııa salmadyńyz. Muny ózgertý kerek, — dedi Vens juma kúni.
Osyǵan deıin Vens AQSh-tyń Grenlandııaǵa delegatsııasyn basqaratyny habarlandy.