Danııa 2026 jyldan bastap qaǵaz hat tasýdy tolyǵymen toqtatady

ASTANA. KAZINFORM — Danııadaǵy sońǵy qaǵaz hat jeltoqsan aıynyń sońynda aıaǵynda jetkiziledi. Jańa jyldan bastap poshta jáshikteri bólshekteledi, dep habarlaıdy DW.

Elde 2000 jyldan beri poshta jóneltilimderiniń kólemi 90% qysqardy. Danııanyń NordPost poshta qyzmeti barlyq otandyq básekelesten ozý úshin eń aldymen sálemdemelerdi jóneltýge kóńil bólýdi kózdep otyr. Qajet bolsa, qaǵaz hattardy nemese ashyq hattardy jiberýge bolady, biraq bul basqa kompanııalar arqyly júzege asady dep josparlanǵan.

Danııa mundaı saıasatty qabyldaǵan birinshi eýropalyq memleket. Qazir Germanııada da poshta tasymalynyń azaıǵany baıqaldy. Biraq poshta dáýiri tolyǵymen aıaqtalǵan joq. Elde 2019 jyly 13,6 mıllıard hat jiberilgen, 2023 jyly kórsetkish 10,3 mıllıardqa deıin tómendedi. Bul jan basyna shaqqanda jylyna shamamen 123 hatty quraıdy. Germanııada hat almasýdyń 95 paıyzy kompanııalar men memlekettik mekemelerden keledi.

— Kólemniń azaıýyna qaramastan, hattar Germanııa úshin mańyzdy bolyp qala beredi jáne biz kóptegen jyldar boıy hattardy óńdeýdi jáne jetkizýdi jalǵastyramyz degen oıdamyz, — dedi Deutsche Post DHL nemis poshta kontserniniń ókili Aleksander Edenhofer.

Onyń aıtýynsha, Danııadaǵy jaǵdaı poshta bıznesi aldynda turǵan qıyndyqty kórsetedi.

— Tsıfrlandyrý ilgerileýde jáne Eýropadaǵy hattardyń kólemi tez azaıyp keledi. Bul barlyq eýropalyq poshta qyzmetterin jetkizýshilerge qysym kórsetip jatyr, — dedi Edenhofer.

Aıta keteıik, elimizde kýrerlik qyzmet bir jylda 3,3%, al sálemdeme jiberý 17,7% qymbattaǵan.