Danıs Qýandyquly 10 jasqa deıingi balalar arasynda álem chempıony boldy
Mysyrdyń Sharm el Sheıh qalasynda ótken álem chempıonatynda qazaqstandyq Danıs Qýandyquly 10 jasqa deıingi balalar arasynda birinshi oryndy jeńip aldy, dep habarlaıdy Kazinform.
FIDE baspasóz qyzmetinen habarlaǵandaı, Sharm el Sheıh qalasynda kadetter arasyndaǵy 2023 jylǵy álem chempıonaty aıaqtaldy.
Alty kategorııa boıynsha ótken jarys 16 qazanda bastalyp, 26 qazanda máresine jetti.
Sharaǵa 66 ulttyq federatsııa atynan 502 jas oıynshy qatysty.
Álem chempıony ataný úshin Danıs sońǵy týrda reseılik Nıkolaı Kleımenovpen oınady.
Danıs Qýandyquly qarsylasymen teń oınap, maqsatyna jetti.
10 jasqa deıingiler arasynda ekinshi oryn amerıkalyq Itan Gýoǵa, qola medal shotlandyq jetkinshek Sýpratıt Banerjıge buıyrdy.
Kishkentaı qazaqstandyqtyń jetistigi erekshe nazar aýdarýǵa laıyq.
Danıs Qýandyquly alǵash ret kadetter arasyndaǵy týrnırde Qazaqstanǵa altyn medal áperip otyr.
Shahmat álem chempıonatynyń taǵy bir medalin — qolany qazaqstandyq Aıarý Altynbek aldy.
