Danıl Vasılev jazǵy Gran-prı jarystarynda tarıhı nátıjege qol jetkizdi
ASTANA. KAZINFORM — Shańǵymen tuǵyrdan sekirýden Qazaqstan quramasynyń sportshysy Danıl Vasılev jazǵy Gran-prı jarystarynyń jalpy esebinde úshinshi orynǵa ıe boldy, dep habarlaıdy UOK baspasóz qyzmeti.
Serııanyń sońǵy kezeńi Germanııanyń Klıngental qalasynda ótti. Maýsym qorytyndysy boıynsha otandasymyz 201 upaı jınap, úzdik úsh sportshynyń qataryna endi.
Jalpy esepte 450 upaı jınaǵan japonııalyq Naokı Nakamýra jeńimpaz atandy. Ekinshi oryndy 216 upaımen avstrııalyq Danıel Chofenıg ıelendi. Al shveıtsarııalyq Gregor Deshvanden 196 upaımen tórtinshi orynǵa turaqtady.
Osylaısha Danıl Vasılev jazǵy Gran-prı jarystarynyń jalpy esebinde úshinshi oryn alyp, shańǵymen tuǵyrdan sekirýden Qazaqstan tarıhyndaǵy aıtýly jetistikterdiń birine qol jetkizdi.
Buǵan deıin Azııa Para oıyndarynda Qazaqstan 50 medal jeńip alyp, úzdik ondyqqa engenin jazǵanbyz.
