Danıl «molodoy» Golýbenko nege ulttyq quramada joq — mınıstr

ASTANA. KAZINFORM — Qazaqstan atynan halyqaralyq kıbersport týrnırlerine qatysyp júrgen jas sportshy Danıl Golýbenko ázirge ulttyq quramanyń múshesi emes. Degenmen Federatsııa men Sportty damytý dırektsııasy onyń halyqaralyq arenadaǵy óner kórsetýine qoldaý bildirip keledi.

Danıl «molodoy» Golýbenko
Foto: HLTV

Mınıstrdiń aıtýynsha, kıbersport sport salasyndaǵy jańa baǵyttardyń biri. Sondyqtan ony qarjylandyrý men sportshylardy irikteý kezinde dástúrli sport túrlerindegi talaptardy birdeı qoldaný ázirge múmkin emes.

— Bul sport túrinde naqty krıterııler qoıýǵa bolmaıdy. Kıbersport ol jańa baǵyt, biz ázirge ulttyq chempıonattarǵa basymdyq berip otyrǵan joqpyz. Ol ulttyq quramanyń qataryna kirmeıdi, biraq elimizdiń atynan halyqaralyq týrnırlerge qatysyp júr. Bul baǵytta ózgeshe tásil qoldanylady, — dedi QR Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda jýrnalısterdiń suraǵyna.

Vedomstvo basshysynyń sózinshe, kıbersportshy klýbtyq jarystarǵa qatysady. Ony halyqaralyq deńgeıde ilgeriletý baǵytynda Kıbersport federatsııasy belsendi jumys júrgizip keledi. Sonymen qatar Sportty damytý dırektsııasy tarapynan da qoldaý kórsetiledi.

Mınıstr Qazaqstanda kıbersportty damytý maqsatynda birqatar halyqaralyq is-shara uıymdastyrylǵanyn eske saldy. Atap aıtqanda, elimizde Bolashaq oıyndary ótkizilip, PGL týrnırleri uıymdastyrylyp keledi.

Erbol Myrzabosynov aldaǵy ýaqytta kıbersport boıynsha otandyq jarystar júıesin qalyptastyrý qajettigin de atap ótti. Onyń ishinde balalar, jasóspirimder jáne eresekter arasyndaǵy Qazaqstan chempıonattaryn ótkizý máselesi bar.
Mınıstrdiń aıtýynsha, osy júıe qalyptasqannan keıin kıbersportshylardy ulttyq quramaǵa qabyldaý talaptaryn da qaıta qaraýǵa múmkindik týady. Bolashaqta bul sport túri Sportty damytý dırektsııasynyń talaptaryna sáıkes kelip, ulttyq qurama sportshylaryna arnalǵan krıterıılerge engizilýi múmkin.

Aıta keteıik, qazaqstandyq kıbersportshy kezekti márte halyqarylyq týrnırde top jarǵan edi.