Danıal Ahmetov jýrnalısterdi azamattyq belsendilik tanytýǵa shaqyrdy
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov keńeıtilgen apparat jıynynda jýrnalısterdi azamattyq belsendilik tanytýǵa shaqyrdy, dep habarlaıdy óńir basshysynyń baspasóz qyzmeti.
ShQO týrıstik aýmaqtarynda jumys isteıtin bıznesmender endi óz kiristerin jasyryp, jaltara almaıdy. Ol úshin 2019 jyldan bastap arnaıy baqylaý júıesi engiziledi. Oǵan sebep Alakól men Buqtyrma sý qoımalaryndaǵy demalys bazalarynan túsetin salyq kólemi. Mundaǵy qarjy aınalymy 10 mıllıard teńgeni quraǵanymen túsim 22 mıllıonnan aspaı otyr.
Salyq tólemderiniń júıesi týraly usynys daıyndaýǵa arnaıy jumys toby kirisedi. Kásipkerler palatasy da endi shette turyp baqylaýdy qoıyp, túsindirý jumystaryn bastaıdy. ShQO ákimi Danıal Ahmetov «bıznesmenderdiń aryn oıatý máselesi» sheshimin tabý úshin jýrnalısterdi de azamattyq belsendilik tanytýǵa shaqyrdy.
- Bul iske tek men emes, jýrnalıster de shaqyrýy kerek. Eki demalys aýmaǵyndaǵy qarjy aınalymy bir maýsymda 10 mıllıard teńgeni quraıdy. Al bizdiń aıbyndy kásipkerlerimizden túsetin salyq 14 pen 22 mıllıonnyń arasy. Shyǵys Qazaqstan bıznesiniń týrıstik salasyn damytýǵa bergen jaýaby osy. Infraqurylymdy damytýǵa memleket mıllıardtaǵan qarajat bóledi, biraq qaıtarymy joq. Salyq kólemi ondaǵan ese kóp bolýy tıis. Onyń bárin jaqsy bilemiz. Ázirge, aldaǵy jyly mazalamaımyz. Biraq 2019 jyly bári basqasha bolady, - dedi Danıal Ahmetov keńeıtilgen apparat jıynynda.
Buǵan qaramastan memleket óz qoldaýyn toqtatpaq emes. Keler jyly Osınov asýynan aınalyp ótetin joldyń qurylysy bastalady. Bul baǵyt turǵyndar men qonaqtarǵa Buqtyrma sý qoımasyna jyldam ári qaýipsiz jetýge múmkindik beredi. Alakól jaǵalaýyn abattandyrý jumystary da jalǵasyn tappaq.
