Danıal Ahmetov jóndeý jumystaryn talapqa saı atqarmaǵan merdigerlerdi synǵa aldy
ASTANA. QazAqparat - Shyǵys Qazaqstan oblysynyń ákimi ákimi Danıal Ahmetov jaqynda ǵana Óskemendegi kóshelerdiń birine júrgizilgen jóndeý jumystarynyń sapasyn qatań synǵa aldy. Qyrýar qarjy quıylǵan joldyń jańa jabyndysy qalalyqtarǵa uzaq qyzmet ete qoımasy anyq. Іsine salǵyrt qaraǵandar endi olqylyqtyń ornyn toltyrýǵa mindetti, dep habarlaıdy Shyǵys qazaqstan oblysy ákimdiginiń baspasóz qyzmeti.
Baspasóz málimetterine qaraǵanda, oblys kóleminde júrip jatqan jol jóndeý jumystarynyń barysy talqyǵa túsken keńeıtilgen apparat otyrysynda aımaq basshysy jaýapsyz merdigerler máselesine erekshe toqtaldy.
«Bajov kóshesinde atqarylyp jatqan jumystar sapasyz. Eki jyldan keıin joldyń jaǵdaıy qaz-qalpyna túsedi. Biz jumys aqysyn tolyq tóleımiz, al olar moıyndaryna alǵan mindetti tolyq oryndamaıdy. Arnaıy komıssııa quryp, ýchaskege tekserý júrgizýdi tapsyramyn. Barlyq kemshilikter joıylýy tıis», - dedi Danıal Ahmetov.
Jalpy Óskemendegi joldardy jańartýǵa 8 mıllıardtan astam teńge qarastyrylyp otyr. Olardyń 5,7 mlrd. teńgesi qaıta qurýǵa josparlansa, 1,5 mlrd. teńge orta jóndeýge, 900 mln. teńge kóshe-jol jelilerin ustaýǵa baǵyttalǵan. Búginde ortalyq kóshelerde orta jóndeý jumystary 90 paıyzǵa deıin oryndaldy.
