Danıal Ahmetov: Jeńil atletıkaǵa erekshe nazar aýdarylýda
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov óńirden Tokıo Olımpıadasyna barǵan sportshylarmen kezdesti, dep habarlaıdy QazAqparat tilshisi.
Aımaq basshysy sportshylarǵa gúl shoqtaryn tabystap, el namysyn qorǵaýǵa bar kúsh-jigerlerin salǵandary úshin alǵys bildirdi.
«Osy jolǵy álemdik dodada sportshylarymyzdyń baǵy janbaı qaldy. Biraq áli alda talaı baıraqty báseke bar. 2022 jyly Qazaqstanda alǵash ret jeńil atletıkadan jabyq alańda Azııa chempıonaty ótedi. Biz bul sport túrine erekshe nazar aýdaryp kelemiz. Sportshylarymyz jaqsy nátıje kórsete alatynyna senimdimin. Búgingi tańda barlyq oblysta sporttyq bazalar men jattyǵý alańdary jetkilikti», - dedi Danıal Ahmetov.
Onyń aıtýynsha, ótken Olımpıada jattyqtyrýshylar quramyn daıyndaýǵa erekshe nazar aýdarý kerektigin kórsetti.
«Bapkerler úshin sportshylardy daıyndaýdyń úsh deńgeıli júıesin ázirledik. Óıtkeni eski ádister búgingi kúnniń talabyna saı kelmeıdi. Bul tásildi jańartyp, fızıkalyq daıyndyq tehnıkasyn ǵana emes, ınnovatsııalardy da qoldaný kerek. Qazirgi zamannyń sport ǵylymy bizge jańa chempıondardy tárbıeleýge múmkindik beredi. Koronavırýs pandemııasy sport salasyna da keri áserin tıgizdi. Kóptegen jarystar toqtatylyp, Olımpıada aldyndaǵy daıyndyqtar az boldy. Stadıondar men arenalar bos qaldy. Bul sportshylardyń damýyn tejedi. Endi aldaǵy jattyǵýlar, jattyqtyrýshylardyń belsendi jumys isteýi bıik tuǵyrdaǵy orynǵa jeteleý kerek. Eń bastysy – bizdiń sportshylarda jeńiske degen qushtarlyq basym», - dedi oblys ákimi.
