Danıal Ahmetov Zaısan aýdanyn gazǵa qysqa merzimde qosýdy tapsyrdy
ÓSKEMEN. QazAqparat - Qazan aıynda Zaısan aýdanynyń toǵyz aýylyna kópten kútken gaz beriledi, dep habarlaıdy QazAqparat tilshisi.
Búgin «Nur Otan» partııasynyń bıýro májilisinde Zaısan aýdanynyń eldi mekenderin gazben qamtý máselesi qaraldy. Osy másele boıynsha qurylǵan arnaıy komıssııa músheleri gaz qubyrlarynyń áli memleket menshigine alynbaǵanyn málimdedi. Komıssııa ókilderiniń aıtýynsha, gazǵa qosylýy tıis 9 aýyldyń birde-bir úıine gaz berilmegen.
«Jumys toby aýyldardy gazdandyrý jobasy boıynsha kesteniń birneshe márte buzylǵanyn anyqtady. 15 qazan kúni jobanyń basyna baramyz. Sol jerde kóshpeli otyrys ótedi. Oǵan deıin jumys toby tekserý júrgizip, shynaıy jaǵdaıdy anyqtaıdy. Kóshpeli májiliske deıin 9 eldi meken gazǵa qosylmasa, qatań shara qoldanamyz» - dedi oblys ákimi Danıal Ahmetov.
Aýdan ákimi Temirbek Qasymjanovtyń aıtýynsha, kógildir otynnyń ıgilin kórýi tıis 1328 úıdiń 520-sy gazǵa qosylýǵa ótinish jazǵanyn alǵa tartty. Al ázirge 157 úıge ǵana gaz berilgen. Qalǵan úıler 15 qazanǵa deıin tolyq qosylmaq.
«5 qazanǵa deıin barlyq úı gazǵa qosylatyn bolsyn. Ol úshin aýdannyń ákimine tyńǵylyqty is atqaryp, árbir turǵynmen jeke jumys isteý qajet» - dedi Danıal Ahmetov.
