Danıal Ahmetov: Ulttyq ıadrolyq ortalyq qyzmetkerlerine jaǵdaı jasalýy tıis
ÓSKEMEN. QazAqparat – QR Energetıka mınıstri Nurlan Noǵaev pen Shyǵys Qazaqstan oblysynyń ákimi Danıal Ahmetov Kýrchatov qalasyndaǵy QR Ulttyq ıadrolyq ortalyǵynyń jumysymen tanysty, dep habarlaıdy QazAqparat tilshisi.
Burynǵy Semeı synaq polıgonynyń áskerı-ónerkásiptik kesheniniń bazasynda jumys isteıtin Ulttyq ıadrolyq ortalyqty aralaǵan Nurlan Noǵaev pen Danıal Ahmetov «Baıkal-1» kesheniniń zertteý reaktorlary men KTM materıaltaný tokamagy keshenderine bardy.
«Delegatsııa músheleri «Baıkal-1» kesheniniń IVG 1.M reaktoryn konversııalaý jónindegi atqarylǵan aýqymdy jobanyń nátıjeli jumysyna baǵa berdi. MAGATE talaptaryna sáıkes bul joba otyn baıytýdy 20% deńgeıine deıin tómendetedi. Jumystar sátti aıaqtalǵannan keıin mamandar reaktordy iske qosýǵa jáne paıdalanýǵa tapsyrady. Qazir IGR zertteý reaktory kesheninde aýyr apattardy modeldeıtin eksperımentter júrgizilýde. 30 jyldan astam ýaqyt ishinde munda perspektıvaly reaktorlardyń qaýipsizdigin arttyrýǵa qajet biregeı aqparattar jınaqtalǵan», - dep habarlady ShQO ákiminiń baspasóz qyzmeti.
Danıal Ahmetovtiń aıtýynsha, QR Ulttyq ıadrolyq ortalyq qyzmetkerlerine qolaıly jaǵdaı jasalýy tıis.
«Beıbit atomdy zertteý elimiz úshin de, ǵylym úshin erekshe mańyzǵa ıe. Budan bólek, ıadrolyq ortalyqtyń jumysy bizdiń aımaqqa da oń áserin tıgizetin bolady. Sondyqtan ortalyqtyń qyzmetkerleri men Kýrchatov qalasynyń turǵyndary úshin zamanaýı dene shynyqtyrý-saýyqtyrý ortalyǵyn jáne basqa da áleýmettik-mádenı nysandar salý máselesin pysyqtap jatyrmyz», - dedi ol.
29 tamyz kúni Semeı ıadrolyq synaq polıgonynyń jabylǵanyna 30 jyl tolady. QR Energetıka mınıstriniń aıtýynsha, osy kúnge deıin polıgonnyń lastanǵan jerlerinde ıadrolyq jáne radıatsııalyq qaýipsizdikti qamtamasyz etý úshin «Semeı ıadrolyq qaýipsizdik aımaǵy týraly» Zań qabyldaý josparlanyp otyr.
«Búgingi tańda Ulttyq ıadrolyq ortalyq mamandary polıgon aýmaǵyn keshendi radıoekologııalyq zertteýdi aıaqtady. Sonyń nátıjesinde mol aqparat alyndy. Endi aımaqtyń ekologııalyq problemalaryn sheshý qajet», - dedi N.Noǵaev.
