Danıal Ahmetov tótenshe jaǵdaı qyzmetine qosymsha qarjy bólgizbek
ÓSKEMEN. QazAqparat - Shyǵys Qazaqstandaǵy sý basqan úılerdiń sany 489-ǵa jetti. Aımaqtyń ákimi Danıal Ahmetov onyń 236-sy qalpyna keltirýge jaramdy ekenin aıtty, dep habarlaıdy QazAqparat tilshisi.
Oblystaǵy sý tasqynyna baılanysty ótken brıfıngte Danıal Ahmetov úıi jaramsyz bolyp qalǵan turǵyndardyń barlyǵyna baspana beriletinin aıtty.
Mundaı kómek Aıagóz, Glýbokoe, Shemonaıha aýdany men Óskemen qalasynyń tasqynnan zardap shekken turǵyndaryna kórsetilmek. Aıagóz aýdanynda baspana satyp alýǵa qajet qarjy bólinip qoıǵan. Úısiz qalǵan otbasylardyń aldy jańa baspanasyna kóship te úlgerdi. Munda 14 úı qulap, 19 úı apattyq jaǵdaıǵa túsken bolatyn. Olardyń ornyna úı satyp alý úshin qaıyrymdylyq qorlary men rezervtik qordan qarjy bólinýde. Al qulaǵan úıdiń jer telimderi memleket menshigine ótpek.
Danıal Ahmetov Glýobokoe aýdanynda mundaı kólemdegi jańbyr sońǵy 30 jylda bolmaǵanyn aıtty. 2 kúnniń ishinde aýdanǵa úsh aıdyń mólsherine para-par jaýyn túsken. Kónekóz turǵyndar mundaı jaýyn osydan 30 jyl buryn bolǵanyn aıtqan. Qar juqa túskendikten, tereńdep ketken toń jibip úlgermeı, qar sýy jerdiń betimen aqqan.
Al Shemonaıha aýdanynda Úbe ózeninen seń júrý saldarynan 42 úıdi sý alyp, 35-i qıraǵan. Óskemendegi tasqynǵa toqtaýsyz jańbyr men taýdan aqqan qar sýy sebepker bolǵan. Sonyń saldarynan 72 úı sý astynda qalyp otyr. Onyń tek 14-inen sý sorǵytylǵan. Katonqaraǵaı aýdanynda 6 úıdi sý basyp, 3-ýi jaramsyz kúıge tústi.
Oblys ákimi baspanasy búlingen turǵyndardyń eshbiri úısiz qalmaıtynyn atady. Brıfıngte tasqynǵa ushyraǵan aýdan, qalalardyń ákimderi de sóz sóılep, jaǵdaıdy baıandady. Zyrıan aýdany men Rıdder qalasynda jaǵdaı ázirshe turaqty. Bul eki óńirge tasqyn keshigip jetetin túri bar. Semeıde 5 saıajaı úıin sý alǵan.
Brıfıng sońynda Danıal Ahmetov tótenshe jaǵdaılar departamentine 289 mln teńge bólinetinin málimdedi.
«Tótenshe jaǵdaı qyzmetiniń óz vedomstvosy bar. Degenmen sońǵy jaǵdaılar bul qyzmetti áli jabdyqtarmen tolyqtyrý kerektigin kórsetti. 289 mln teńge osy maqsatta bólinip otyr. Qajet bolsa taǵy bólýge daıynbyz» - dedi ol.
