Danıal Ahmetov: Tasqynnyń shyǵyny 3 mlrd teńgeden asty
ÓSKEMEN. QazAqparat - Shyǵys Qazaqstannyń Zyrıan aýdanynda jaǵdaı áli kúrdeli. Bul týraly oblys ákimi Danıal Ahmetov BAQ ókilderimen ótken brıfıngte aıtty, dep habarlaıdy QazAqparat tilshisi.
Zyrıan aýdanynda Buqtyrma ózeniniń tasýy saldarynan júzdegen úı bıiktigi 2,3 metr sýdyń astynda qalyp otyr.
Ákimniń aıtýynsha, sońǵy 3 kúnniń ishinde ózenge keptelgen muzdy jarý úshin 17 tonna qoparǵysh zat qoldanylǵan. Sınoptıkter aldaǵy 3-4 kúnde kún raıy kúrt jylynyp, jaǵdaı odan ári ýshyǵýy múmkin ekenin eskertipti. Al taýlarda qar áli erip úlgermegen.
«Osy jaǵdaıdyń bári adam resýsrsy boıynsha da, tehnıkalyq turǵydan da kóp kúsh jumsaýdy talap etedi. Ótken demalys kúnderi 811 adam qutqarylǵan bolatyn. Qazir 474 turǵyn óz úılerine qaıtyp kirdi. Apta sońyna qaraı taǵy da tasqyn kútilýde. Jamandyq shaqyraıyq dep otyrǵan joqpyz, biraq jaǵdaı óte kúrdeli bolǵandyqtan, bárine daıyn bolýymyz kerek. Qazir aýdan boıynsha myńdaǵan adamǵa ýaqytsha baspanalar daıyndalýda» - deıdi Danıal Ahmetov.
Aýdan boıynsha apat saldaryn joıýǵa 400-den astam adam jumyldyrylǵan. Kommýnaldyq qyzmet, tótenshe jaǵdaı mamandary men áskerılerden bólek eriktiler de júr. Bykov aýylynyń jolyndaǵy kópir qazir qalpyna kelip, qatynas qaıta jandanǵan. Buqtyrma, Vtorýshka, Grıaznýshka, ózenderiniń arnasy bekemdelip, Al Maleev aýylynyń syrtyndaǵy 7 metrlik dambydan sý men seń qaıta-qaıta asyp ketýde. Munda dambany bıiktetý jumystary jandanǵan.
Onyń aıtýynsha, tasqynnan qatty zardap shekken 5 aýdan men 2 qalada 1371 úı sý astynda qalyp, 3400 adam kóshirilgen. Apat saldaryn joıýǵa 3492 adam juyldyrylǵan. Qazirge deıingi apat shyǵyny 3,2 mlrd teńgege dep baǵalanyp otyr. Munshama qarajat qıraǵan úılerdiń ornyna baspana satyp alý, joldar men kópirlerdi jóndeý, ózen arnalaryn bekemdeý, sý kózderin tazalaý sııaqty sharalarǵa jumsalmaq. Apattan turǵyndarǵa kelgen shyǵyn kólemin esepteýshi komıssııalardyń jumysy áli jalǵasýda.
«Aldyn ala esep boıynsha barlyǵy 104 úı tolyq búlingen. Zyrıan aýdanynda bul san ósýi múmkin. Munda sý alǵan 414 úıdiń 135-i áli sý qursaýynda. Aýdannyń kónekózderi ózen betine 2 metr muz qatýy sońǵy 60 jylda bolmaǵan dep otyr» - deıdi aımaq basshysy.
Tasqynnan qatty zardap shekken Aıagóz, Glýbokoe, Shemonaıha, Besqaraǵaı, Zyrıan, Katonqaraǵaı aýdandary men Semeı jáne Óskemen qalalary boıynsha jeke-jeke málimet bergen ákim jergilikti ákimdik qyzmetkerleri men tótenshe jaǵdaı mamandarynyń jankeshtilikpen eńbektenip jatqanyn aıtty. Sol sózine dálel retinde Zyrıan aýdany ákiminiń orynbasary Janna Asqarovanyń basynan ótken jaǵdaıdy mysalǵa keltirdi.
Al tikushaqtyń tizginin ustaǵan Danıla Gýrın kúnniń bultty bolǵanyna qaramastan, jarylǵysh zattardy qajet jerge úzdiksiz jetkizip turǵan. Jýrnalısterdiń saýaldaryna jaýap bergen Danıal Ahmetov tasqynnyń osyndaı aýqymǵa taralýynyń sebebi muqııat tekseriletinin aıtty.
«Mysaly, Semeıdegi tótenshe jaǵdaıdyń bir sebebi «adam faktory» dep qazirdiń ózinde aıta alamyn. Bul ispen prokýratýra aınalysyp jatyr. Ertis basseındik ınspektsııasy Shúlbi SES-nen mólsherden tys sý aǵytqan. Ony Sý resýrstary komıtetiniń tóraǵasy Islam Ábishev te óńirge kelgen kezinde rastady» - dedi óńir basshysy.
