Danıal Ahmetov Street Workout alańynyń ashylýyna qatysty
ASTANA. QazAqparat - Óskemende sportty serik etken azamattardyń qoldanysyna jańadan ashylǵan StreetWorkout alańy berildi. Alańnyń ashylýyna Shyǵys Qazaqstan oblysynyń ákimi Danıal Ahmetov qatysty, dep habarlaıdy QazAqparat altaynews.kz saıtyna silteme jasap.
Elimizge Street Workout sporty kesh kelse de birqalypty damý ústinde. ShQO da sońǵy birer jylda sporttyń bul túri jaqsy qarqyn ala bastaǵany kezdeısoq emes. Aıta ketsek, aımaq basshysy Danıal Axmetovtiń tapsyrmasymen 2016 jyldan beri birneshe qala men aýdanda Street Workout alańdary ashyldy.
«Jyl saıyn sportpen shuǵyldanatyn jastar sany artyp keledi. Qalamyzda salaýatty ómir saltyn ustanatyndar qatarynyń kóbeıýi asa mańyzdy. Sport alańynyń ashylýyna arnaıy kelgen qonaqtarǵa alǵysymdy bildiremin. Kórsetken ónerlerińizge tánti boldym. Osydan keıin bul sportqa halyqtyń qyzyǵýshylyǵy arta túsetinine senimdimin», - dedi oblys ákimi Danıal Ahmetov.
Alańnyń ashylýyna qala turǵyndary, óńirdiń jas sportshylary, sondaı-aq Street Workout boıynsha Qazaqstan Respýblıkasynyń bas bapkeri Aıtym Jaqypov pen «Bar Bars» komandasynyń ókilderi qatysty.
Shara barysynda elordalyq sportshylar 60-tan asa óskemendik jasqa sheberlik sabaǵyn ótkizdi. Esterińizge sala keteıik, jýyrda ShQO-da Street Workout-tan oblystyq týrnır ótti. Oǵan óńirdiń aýdan-qalalarynan barlyǵy 16 komanda qatysty.
