Danıal Ahmetov shyǵystaǵy ahýal jaıynda Úkimetke esep berdi
ASTANA. QazAqparat - Aıagózde sý tasqynynan zardap shekken úıler 1 aıdyń ishinde tolyqtaı jóndeledi. Bul týraly Úkimettiń selektorlyq rejimdegi otyrysynda Shyǵys Qazaqstan oblysynyń ákimi Danıal Ahmetov aıtty, dep habarlaıdy QazAqparat.
Oblys basshysynyń aıtýynsha, sý tasý qaýpine baılanysty joǵary deńgeıdegi daıyndyq rejimi Óskemen jáne Semeı qalasynda, Jarma, Zyrıan, Kúrshim, Qatonqaraǵaı, Ulan aýdandarynda engizildi. Oblystyń úsh aýdanynda Aıagóz, Glýbokoe, Shemonaıhada tabıǵı sıpattaǵy tótenshe jaǵdaı jarııalanǵan.
«Aıagózde 14 úı qırap, 19 úıdiń jaǵdaıy apatty dep tanyldy. Qazirgi kezde jaǵdaı turaqty. 286 adam úıine oraldy. Tek 12 adam ınternatta ýaqytsha turyp jatyr. Ótken eki aptanyń ishinde 32 úı satyp aldyq. 14 úıge turǵyndar ornalasty, eki-úsh kúnniń ishinde qalǵan 18 úıge adamdar kiredi. Búgin men sol jaqqa taǵy da baramyn. Qurylysshylarmen birge barlyq 140 úıdiń jóndeý jumystaryna baqylaý jasap, ony bir aıdyń ishinde júzege asyramyz. Qazirgi kezde osy aýdanǵa 259 mln teńge bóldik. Barlyq jóndeletin úılerdiń jobalyq-smetalyq qujattamasy daıyn», - dedi Danıal Ahmetov.
Onyń dereginshe, Glýbokoe aýdanynda Progress, Beloýsovka kentteri men aýdan ortalyǵy turaqty baqylaýǵa alynǵan. Adamdardy qaýipsiz jerge kóshirý boıynsha tıisti sharalar qabyldanǵan.
«Jalpy 172 úıge sý kirgen. 567 adam sý basý qaýpi bar aımaqtan qaýipsiz jerge kóshirildi. Olardyń ishinde 53 adam úsh mektep-ınternatqa ornalastyryldy. Úsh merzimdi tamaq jáne basqa da máseleler sheshilgen. Qalǵan turǵyndar óz týystarynyń úılerine ýaqytsha kóship bardy. Qazir arnaıy komıssııa qurylyp, zardap shekken úı maldarymen tanysyp jatyr. Biz komıssııa sheshimin basshylyqqa alyp, shyǵyndy óteımiz. Suraqty tez sheshý úshin qaıyrymdylyq qoryna 50 mln teńge berdik», - dedi ol.
ShQO ákimi jaǵdaımen tanysý úshin Shemonaıha aýdanynda bolǵanyn da atap ótti.
«Qazir jaǵdaı bylaı, jaýyn sýy taýdyń qar sýymen aralasyp, Úbe ózeniniń deńgeıi 1,5 metrge kóterildi. Ol meniń kezimde boldy. Saldarynan ózen muzy qozǵalyp, seń júrdi. Aıta ketý kerek, ózen muzyn der kezinde jarmaǵanda apat saldary munan da birshama qıyn bolar edi. Sondyqtan bul jumys jalǵasyp jatyr. Aýdanda 42 úıge sý kirgen. Qazir barlyq turǵyndar úılerine oraldy. Tıisti komıssııa jumys istep jatyr. Arnaıy qor ashý boıynsha sharalar qabyldandy. Búgin osy aýdanǵa taǵy 50 mln teńge bólemiz. Jalpy oblystaǵy jaǵdaı táýlik boıy baqylaýǵa alyndy. Jedel sharalar qabyldanyp jatyr. Tıisti qyzmetter tolyǵymen tartylǵan. Barlyq másele baqylaýda», - dedi Danıal Ahmetov.
