Danıal Ahmetov ShQO-nyń karantınnen qalaı shyǵatynyn aıtty
ÓSKEMEN. QazAqparat – Shyǵys Qazaqstan oblysynda 12-mamyrdan bastap Semeıden ózge barlyq qalalar men aýdandarda kezeń-kezeńmen jumys rejımine kóshý bastalady, dep habarlaıdy QazAqparat tilshisi.
Bul týraly aımaq basshysy Danıal Ahmetov óziniń Instagram -daǵy paraqshasynda jazdy.
«Der kezinde qabyldanǵan sharalar men turǵyndardyń tanytqan jaýapkershiliginiń arqasynda Shyǵys Qazaqstanda basqa aımaqtarǵa qaraǵanda COVID-19 vırýsyn juqtyrý deńgeıi aıtarlyqtaı tómen ekeni belgili. Pandemııanyń alǵashqy kúnderinen bastap bizdiń mejege alǵan basty maqsatymyz - óńir halqynyń ómiri men densaýlyǵyn saqtaý. Sondyqtan koronavırýstyń jańa jaǵdaılarynyń bolmaýyna kepildik beretin tıisti sharalardy qabyldaımyz», - deıdi ákim.
Onyń aıtýynsha, ShQO karantınnen kelesi retpen shyǵady: 12 mamyrda Semeıden ózge barlyq qalalar men aýdandarda kezeń-kezeńmen jumys rejımine kóshý bastaldy. Búginde 500 sharshy metrden aspaıtyn azyq-túlik emes taýarlardyń kóterme jáne bólshek saýda obektileri, sondaı-aq, sulýlyq salondary, gúl dúkenderi jumysqa kirisken.
«18 mamyrdan bastap kompıýterlik, turmystyq tehnıkalardy satý jáne jóndeý salondary ashylady. Bul sanatqa qurylys materıaldaryn bólshek satýmen aınalysatyn saýda oryndary, avtosalondar, lombardtar, kir jýý jáne hımııalyq tazalaý kásipkerlik nysandary kiredi. Budan bólek, ashyq alańdaǵy sport nysandary, qashyqtan jetkizý jáne tamaqty ózimen birge alyp ketý shartymen qoǵamdyq tamaqtaný oryndary iske kirisedi. Aldyn ala kezekti brondaý tártibi boıynsha HQKO jumysy bastalady», - deıdi Danıal Ahmetov.
Saıajaıǵa jup, taq kúnderi, senbi, jeksenbi jáne mereke kúnderin qosa alǵanda barýǵa ruqsat berilgen.
«Jaǵdaı jaqsarǵan jaǵdaıda, ruqsattama boıynsha qozǵalys rejımi toqtatylady. Qaýipti vırýspen kúres aıaqtalmaǵandyqtan, sizderden óz ıgilikterińiz úshin betperde kıip júrýdi, áleýmettik qashyqtyqty qatań saqtaýdy suraımyn. Jumys rejımine kóshýdiń barlyq kezeńderi oblystaǵy epıdemıologııalyq ahýalǵa baılanysty bolatynyn erekshe atap ótkim keledi. Jalpy, karantın rejımin aıaqtaý, qalypty tynys-tirshilikke oralý maýsymnyń basyna boljanyp otyr», - deıdi aımaq basshysy.
