Danıal Ahmetov ShQO kóshe ataýlaryn ózgertý jaıly: Másele ultta emes, eldiń saıasatynda
ASTANA. QazAqparat - Shyǵys Qazaqstan oblysynyń ákimi Danıal Ahmetov Semeı qalasyndaǵy áýejaıdyń atyn «Abaı joly» dep ataýǵa qatysty pikirin bildirdi, dep habarlaıdy QazAqparat tilshisi.
«Semeı áýejaıynyń ataýyn ózgertý durys ıdeıa, halyqpen aqyldasaıyq. Qazir Reseıde de sondaı úlken jumys júrgizilip jatyr (...) Biz de qarap kóreıik. Biraq, Abaıda «Abaı arena» degen tamasha ǵımarat salynyp jatyr. Múmkin ol Shákárim be, álde Muhtar Áýezov bola ma - ıdeıańyz jaqsy, oılanaıyq. Sodan keıin bir durys sheshimge kelemiz degen oıdamyn», - dedi Danıal Ahmetov OKQ-da tilshilerdiń suraǵyna jaýap bere otyryp.
Oblys ákimi óz sózinde Shyǵys Qazaqstandaǵy 1 myńnan astam kósheniń atyn 314-niń ataýy aýystyrylǵanyn atap ótti.
«Mysaly, Óskemende Karl Marks dańǵyly qazirgi kezde Qaz daýysty Qazybek boldy. Ordjonıkıdze degen kóshe boldy. Endi Ordjonıkıdzeniń kim bolǵanyn bilemiz ǵoı... Qazir ol kósheniń aty - Saǵadat Nurmaǵambetov. Golovkov kóshesiniń aty qazir - Beıbitshilik. Semeıdegi Lenın kóshesi Máńgilik El boldy. Sol sebepten osy máseleni biz asyqpaı, oılanyp iske asyramyz. Zyrıan degen aýdan - Altaı aýdany boldy. Zyrıan qalasy Altaı qalasy atandy. Sondaǵy halyqtyń 100 paıyzy osy ózgertýdi qabyldady. Másele ultta emes, másele eldiń saıasatynda», - deıdi aımaq basshysy.
Danıal Ahmetov sózin jalǵastyra kele Ordjonekıdze, Goloşekın nemese Kırov sekildi ataýlar mindetti túrde ózgertilgeni durys degen pikir keltirdi.
«Kırov máselen «úshtiktiń» qatysýshysy boldy, onyń tapsyrmasymen myńdaǵan adam atylǵan. Sondyqtan, bul jerde sóz joq, ózgertemiz. Biraq, bul rette ózimizdiń halyqtyń pikirin esepke ala otyryp, zań boıynsha osy jumysty júrgizetin bolamyz. Sosyn mysaly Dmıtrıı Mendeleev atyndaǵy kósheni ózgertý kerek pe? Sol sekildi Sergeı Korolev atynda da kóshe bar. Biraq, Saǵadat Nurmaǵambetov, Qurmanǵazy kósheleri de bolýy kerek. Protses júrip jatyr», - dedi Danıal Ahmetov.
