Danıal Ahmetov ShQO qarttaryn Naýryz meıramymen quttyqtady
ASTANA. QazAqparat - Solnechnyı kentiniń medıtsınalyq-sanıtarlyq mekemesinde Naýryz meıramy toılandy. Aqsaqaldy atalar men aqjaýlyqty ájelerge arnaıy uıymdastyrylǵan merekelik keshke oblys ákimi Danıal Ahmetov qatysyp, aq tilegimen qatar tartýyn da joldady, dep habarlaıdy Shyǵys Qazaqstan oblysy ákimdiginiń baspasóz qyzmeti.
Qazirgi tańda munda 120 adam turyp jatyr. Olar tolyq memlekettiń qamqorlyǵynda. Internat turǵyndarynyń aıtýynsha, mekemeden pana tapqan ár jannyń taǵdyry ár basqa. Dese de, qazir olar birligi jarasqan, úlken bir otbasy.
Olar úshin turmysqa qajetti barlyq jaǵdaı jasalǵan: tolyq medıtsınalyq qyzmet, tórt ýaqyt tamaq, massaj kabıneti, sport zaly, demalys bólmesi. Táýlik boıy kezekshilik etetin meıirbıkelerdiń arqasynda bilikti kómek ala alady. Qarııalar bos ýaqyttarynda tek qalanyń emes, óńirdiń qoǵamdyq ómirine belsene atsalysady. Máselen, Zoıa Sotnıkovanyń aıtýynsha, olar aqjaýlyq ájelerden turatyn mýzykalyq ansambl quryp, jan-jaqqa mýzykalyq saparǵa shyǵady eken. Jaqynda ǵana Serebrıansk, Zevakıno, Pervomaı aýyldaryna baryp qaıtypty. Budan bólek, óleń jazyp, sýret salýmen aınalysady. Qolóner sheberleri de bar. Olar ár toqyǵan kıimderin Sábıler úıine jiberedi. Ómirdiń qıyn-soqpaq kezeńderin qasqaıa qarsy alyp, mánin tanı bilgen qarttar óz kezeginde Áz Naýryzben quttyqtap kelgen qonaqtarǵa dán rıza ekendikterin bildirdi.
«Jastary egde tartqan jandarǵa degen qamqorlyqtaryńyz, qoldaýlaryńyz úshin ınternat turǵyndarynyń atynan zor alǵysymdy bildiremin. Ýaqyt bólip, bizdi arnaıy kelip jyly lebizińizdi bildirgenińiz úshin rızamyz. Óz úıimizdeı bolǵan osy panajaıǵa, mundaǵy jaǵdaıǵa kóńilimiz toq. Bári taza, jyly, jaıly. Qyzmetkerler de jaqsy qaraıdy», - dedi, kózine jas alǵan Valentına Ermolaeva.
Oblys ákimi ár bólmeni aralap, turǵyndarymen áńgimelesti. Olardyń tókken mańdaı teri, sińirgen eńbekteri úshin zor alǵysyn jetkizdi. Qalaı degenmen, aǵa býynnyń eseli eńbeginiń arqasynda qazirgi jastar jańa zamanda, jańa Qazaqstanda baqytty ǵumyr keshýde.
«Naýryz - kóktemniń eń ulyq merekesi. Úmit pen izgilik gúli búr jarar shaq. Tabıǵat jańaryp, jaqsylyqqa degen senim uıalaıtyn kezeń. El bolashaǵy úshin bar kúsh-jigerdi sala, shyn júrekpen qyzmet ettińizder. Sizderge degen meniń qurmetim zor. Aman bolyńyzdar, meniń qurmetti jerlesterim!» - dedi Danıal Ahmetov.
Aımaq basshysy qarttarǵa teledıdar men qysqa tolqyndy pesh syıǵa tartty. Kontsertte Vıacheslav Tkach, Murat Jýanyshbaev, Farıt Ismaılov, Anjelıka Şerbatyh jáne «Ladýshkı» ansambli óner kórsetti. Turǵyndar ónerpazdarmen birge án aıtyp, ortaǵa shyqty. Jastyq shaqtaryn eske túsirgen olar kesh sońynda áıgili Shámshi Qaldaıaqovtyń ánderin shyrqaı, vals bıledi.
