Danıal Ahmetov: ShQO-daǵy órtten zardap shekkenderdiń barlyǵy baspana alady
RIDDER. QazAqparat – Shyǵys Qazaqstan oblysynyń ákimi Danıal Ahmetov Rıdder qalasynyń janyndaǵy Leshoz kentine baryp, turǵyndarmen kezdesti, dep habarlaıdy QazAqparat ákimniń baspasóz qyzmetine silteme jasap.
«Búgin bizdiń óńir úshin óte aýyr kún boldy. Órt kezinde qaza tapqan kent turǵyny Galına Spıvakovanyń týystary men jaqyndaryna qaıǵyryp kóńil aıtamyn. Sondaı-aq, tabıǵı apattan zardap shekken azamattardyń tezirek saýyǵýyn tileımin. Úkimet pen oblys ákimdigi tarapynan sizderge jan-jaqty qoldaý men kómek kórsetiledi! Órtten zardap shekkenderdiń barlyǵy baspana alady!», - dedi Danıal Ahmetov.
Ákim bul jumys el Prezıdenti Qasym-Jomart Toqaevtyń erekshe baqylaýynda ekenin atap ótti. Rastalǵan sońǵy aqparatqa sáıkes, 35 úı men 9 ǵımarat órtendi.
«Qazirgi esep boıynsha, turǵyn úı máselesin tolyq sheshý úshin bizge eki jarym aı qajet. Turǵyndarmen kezdesý barysynda jumys josparyna toqtalyp, barlyq jaǵdaıdy búkpesiz baıandap berdim. Rıdderde salynyp bitpegen birneshe kópqabatty úıler bar, olardy biz satyp alyp, qurylysyn aıaqtaýdy mejege alyp otyrmyz. Bul baspanalar kirpishten jasalǵan, búgin kezdesýden keıin bireýiniń jaǵdaıyn jeke ózim baryp kórdim. Tańerteń qurylys kompanııalarymen birge qalǵan úılerdi baǵalap shyǵamyz», - dedi ShQO ákimi.
Danıal Ahmetovtiń aıtýynsha, turǵyn kópqabatty úıden bas tartsa jáne eskisin jóndeýdi talap etse, onyń jóndeletinin aıtty.
«Qujattardy qalpyna keltirýge qatysty aıtar bolsam. Polıtsııa departamenti men HQKO erteńnen bastap bul jumyspen aınalysady. Barlyq qujatty birqalypty tártipte qalpyna keltiremiz.
Múlik shyǵynyna keletin bolsaq, tólemder zańǵa sáıkes júzege asyrylady. Arnaıy komıssııa jumys istep, shyǵyndardyń qunyn anyqtaıdy jáne zańnama erejelerine sáıkes ótemaqymen aınalysady», - dedi Danıal Ahmetov.
Onyń atıýnysha, agrotehnıkalyq kolledj jataqhanasy men profılaktorıı bazasynda barlyq zardap shekkenderdi qonystandyrý úshin oryn uıymdastyryldy. Sondaı-aq, aldaǵy eki-úsh kúnde órttiń sebebi anyqtalady.
Eske sala ketsek, ShQO-daǵy órtpen kúreske 100 adam men MI-8 tikushaǵy jumyldyrylǵanyn habarlaǵan bolatynbyz. Keıinirek Shyǵys Qazaqstan oblysyndaǵy dala órtiniń jalpy aýmaǵy 310 gektarǵa jetip, 14 úıdi jalyn sharpyǵanyn jáne órtten 1 adamnyń qaza tapqanyn jazdyq.
Sondaı-aq osy órtke baılanysty shuǵyl jeli iske qosyldy.
Memleket basshysy Úkimet pen Shyǵys Qazaqstan oblysynyń ákimdigi órtten zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy.
