Danıal Ahmetov Semeıdegi aıaq kıim fabrıkasyna sapany arttyrýdy tapsyrdy

SEMEI. QazAqparat – Shyǵys Qazaqstan oblysynyń ákimi Danıal Ahmetov Semeı qalasyndaǵy aıaq kıim fabrıkasynyń jumysymen tanysty. Bul jaıly aımaq basshysy Facebook-tegi óz paraqshasynda jazdy, dep habarlaıdy QazAqparat.

«Jańa oqý jylynan bastap az qamtylǵan jáne kópbalaly otbasydan shyqqan oqýshylardy mektep formasymen qatar, aıaq kıimmen de qamtamasyz etemiz. Osy maqsatta bıýdjetten 440 mıllıon teńge qarastyrylǵan. Olardy Semeıdegi fabrıkada, otandyq óndirýshiden alǵymyz kelgen edi. Alaıda, ókinishke qaraı, ónim sapasy kóńilden shyqpady. Sondyqtan, anaǵurlym sapaly ári zamanaýı aıaq kıim úlgisin jasaýǵa bir aı ýaqyt berdim», - deıdi Danıal Ahmetov.

Sonymen qatar ákim Qaraǵaıly shaǵynaýdanyndaǵy qurylys jumystaryn tekserdi. Munda bıyl 25 kópqabatty turǵyn úı boı kótermek. Budan bólek, taǵy 92 úıdiń qurylysyna arnalǵan jobalyq-smetalyq qujattama jasalýda. Osylaısha, aldaǵy ýaqytta bul aýdanda 60 myń adam qonys toıyn atap ótedi.