Danıal Ahmetov Óskemenniń ekologııasy týraly: Jaǵdaı baqylaýda
ASTANA. QazAqparat - Aldaǵy úsh jylda Óskemen qalasynyń iri kásiporyndaryna ekologııany jaqsartýǵa baǵyttalǵan quny 20 mlrd teńgelik jańa tehnologııalar engiziletin bolady. Bul týraly búgin Ortalyq kommýnıkatsııalar qyzmetinde ótken brıfıngte Shyǵys Qazaqstan oblysynyń ákimi Danıal Ahmetov málim etti, dep habarlaıdy «QazAqparat» HAA tilshisi.
«Jaǵdaı jetkilikti dárejede baqylaýda. Biz sońǵy úsh jylda ekologııalyq máselelerge 11 mıllıard teńge bóldik. Aldaǵy úsh jylda taǵy da 20 mlrd teńge qarajat zaýyttardyń kúrdeli jóndeý jumystaryna bólinetin bolady. Bul óte kóp soma ekenin eskerý kerek. Búgingi tańda ekologııalyq jaǵdaı barlyq normatıvterge sáıkes ekenin aıta ketkenim jón. Kúkirtti angıdrıdtiń shyǵarylymy tómendetildi. Sondyqtan, jaǵdaı baqylaýda dep aıtýǵa bolady», - dep atap ótti Danıal Ahmetov.
Sonymen birge aımaq basshysy Óskemen qalasyndaǵy quny 20 mlrd teńgelik jańa tehnologııalar «Kaztsınkke», Tıtan-magnıt kombınatyna jáne Úlbi metallýrgııa zaýytyna engiziletinin málim etti.
«Biraq, siz ben bizge qatysty basqa da másele baryn eskergen durys. Ol qazirgi tańda aýaǵa tútin taratatyn jeke úılerdiń kóptigi. Ol da ekologııalyq ahýaldy jaqsarta túspeıdi», - deıdi óńir basshysy.
