Danıal Ahmetov Óskemendegi jol-jóndeý jumystarynyń barysyn tekserdi
ÓSKEMEN. QazAqparat - Búgin oblys ákimi Danıal Ahmetov jumys kúnin Óskemendegi jol-jóndeý jumystarynyń barysyn tekserýden bastady. Óńir basshysy qaıta qurý isi júrip jatqan qaladaǵy barlyq kóshelerdi aralady, dep habarlaıdy ShQO ákiminiń baspasóz qyzmeti.
Aıta ketý kerek, bul jobalar aldaǵy 15 jylda oblys ortalyǵyndaǵy kólik keptelesin ońtaıly sheshýi tıis. Búginde Sátbaev dańǵylynda jumys barysy qarqyndy. Merdigerler 700 mln teńgeni ıgerip úlgergen. Jibek matalar kombınaty shaǵyn aýdanynyń basty jolyn 6 jolaqty etý josparlanǵan edi, alaıda aımaq basshysy jobalyq-smetalyq qujatqa tolyqtyrý engizýdi tapsyrdy. 
- Ortasyn bólip turǵan jolaqty alyp tastaý kerek. Osylaısha joldy eki esege úlkeıte alamyz. JSQ qysqy maýsymda túzetýler engizińizder. Al qazir qurylys-qurastyrý jumystaryn toqtatpaı, jalǵastyrý qajet. Kelesi jyly 1 mlrd 800 mln teńge bólemiz. Aıyryq jolaq máselesin qarastyrýdy jiti tapsyramyn, - dedi ShQO ákimi Danıal Ahmetov.
- Qaıta qurýdaǵy basty maqsat, sizder Astana kóshesinde istemek bolǵan asfalt jabyndysyn aýystyrý emes, júrý jolaǵyn keńeıtý, - dedi Danıal Ahmetov merdigerlerge qarata. - Taǵy da Astana men Protozanov kósheleriniń jolaǵyn barynsha keńeıtýdi tapsyramyn. Olardyń qatary tórteý bolýy tıis.
Óskemen ákiminiń orynbasaryna keler jyly baıqaýǵa elimizdegi basqa da jobalaýshy uıymdaryn shaqyrý tapsyryldy. Sebebi, jergilikti kompanııalar merzimin keshiktirip qana qoımaı, tekserý kezinde oblys ákimi anyqtaǵandaı, jobada qatelikter jibergen.
Kelesi nysanda isine jaýapsyzdyq tanytqan «ElıtEnergoStroı» kompanııasy ózgelerden erekshelendi. Jóndeý jumystaryna nebári 4 tehnıka jumyldyrylǵan. Seriktestik Lopatıno aralynan Ertis ózeninen ótetin kópirden Ahmer aýylyna deıingi aýmaqtaǵy mindetti moınyna alǵan edi. Tyńdyrylǵan tynymdy is bolmaǵandyqtan, oblys ákimi qarajatty aýrýhananyń qurylysyna aýdarýdy tapsyrdy. Jobanyń jalpy quny 1 mlrd 128 mln teńge. Bıylǵa bólingen ári tolyq ıgerilmegen soma 700 mıllıonnan asa teńgeni quraıdy.
