Danıal Ahmetov Óskemendegi qurylys jumystaryn synǵa aldy
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Óskemen qalasyndaǵy turǵyn úı qurylysyn jáne paıdalanýǵa berý kórsetkishin synǵa aldy, dep habarlaıdy QazAqparat tilshisi.
Ótken jyly óńirde 519,8 myń sharshy metr turǵyn úı paıdalanýǵa berilip, joldardyń 85%-y jóndeldi. Oblys ekonomıkasyna 714,5 mlrd teńge ınvestıtsııa tartyldy. Bul kórsetkish 2019 jylmen salystyrǵanda 112%-ǵa ósken. Sonymen qatar «Bıznestiń jol kartasy-2025» baǵdarlamasy aıasynda isin jańa bastaǵan kásipkerlerge 517 mln teńge mólsherinde 106 grant berildi.
Dese de birqatar qalalar mejeli kórsetkishterge qol jetkize almaǵan. Osy rette aımaq basshysy Danıal Ahmetov orynbasary Baqytjan Baıahmetov pen Óskemen qalasynyń ákimi Jaqsylyq Omardy turǵyn úı qurylysy men paıdalanýǵa berý jumystarynyń baıaýlyǵy úshin synǵa aldy.
«Byltyr qol jetkizgen oń kórsetkishterge jáne turǵyn úıdi paıdalanýǵa berý josparyn 117,4%-ǵa asyra oryndaǵanymyzǵa qaramastan, Óskemende osy baǵytta jumystar sylbyr júrgizilgen. 69% degen óte tómen kórsetkish. Bul qala ákimi Jaqsylyq Omar men meniń orynbasarym Baqytjan Baıahmetov jibergen qatelik. Munymen qoımaı olar bıylǵy qazan aıyna deıin bir de bir sharshy metr turǵyn úıdi paıdalanýǵa berýdi josparlap ta otyrǵan joq. Al qarajat 100% bólingen. Sondyqtan jumaǵa deıin bul máseleni sheshýdi tapsyramyn, – dedi ShQO ákimi.
Sondaı-aq óńir basshysy Semeı, Óskemen, Rıdder qalalaryndaǵy balabaqsha kezegi máselesine toqtaldy.
«Orynbasarym Álisher Marhabatqa, sondaı-aq Semeı, Óskemen, Rıdder jáne Kýrchatov qalalarynyń ákimderine memlekettik-jekeshelik áriptestik aıasynda belsendi jumys isteýdi tapsyramyn. On kún ishinde maǵan naqty usynys engizińizder», - dedi Danıal Ahmetov.
