Danıal Ahmetov qudyqqa qulap kóz jumǵan balanyń otbasyna kóńil aıtty
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Altaı aýdanynda qudyqqa qulap kóz jumǵan balanyń ata-anasyna kóńil aıtty, dep habarlaıdy QazAqparat.
«Kishkentaı Álıhan Talǵatovtyń ata-anasy men jaqyndaryna otbasy taǵdyryna túsken aýyr qaıǵylaryna ortaqtasa, kóńil aıtamyn. Tórt kún boıy aýdan ákimi, barsha altaılyqtar, Sredıgornyı aýylynyń turǵyndary, sondaı-aq eriktiler men qıyn jaǵdaıda shet qalmaı, qol ushyn sozǵan azamattar búldirshindi izdeý jumystaryna qatysty. Qapyda baýyr eti balasynan aıyrylyp qalý – orny tolmas qasiret. Kishkentaı Álıhannyń jarqyn beınesi árbirimizdiń júregimizde máńgi saqtalady. Jany jánnatta bolsyn! Aýdandyq ákimdik tarapynan jerleý rásimin uıymdastyrýǵa jan-jaqty kómek kórsetiledi», - dep jazdy ol óziniń Facebook paraqshasynda.
Eske salsaq, 18 tamyz kúni ShQO-nyń Altaı aýdanynda 2 jasar sábı óz úıiniń aýlasynan joǵalyp ketken bolatyn. Ony izdeý úshin Óskemennen arnaıy mamandar jiberilip, áýeden dron arqyly izdeý júrgizilgen. 20 tamyzda sábıdiń múrdesi óz úıiniń aýlasyndaǵy qudyqtan tabyldy.
