Danıal Ahmetov kómir baǵasyn retteýdi tapsyrdy
ÓSKEMEN. QazAqparat - Shyǵys Qazaqstannyń Úrjar aýdanynda kómir baǵasy 18 myń teńgege jetken. Bul týraly oblys ákimi Danıal Ahmetov ákimdiktiń májilisinde aıtty, dep habarlaıdy QazAqparat tilshisi.
Óńirdiń jylytý maýsymyna qanshalyqty daıyn ekenin oblystyq energetıka jáne kommýnaldyq sharýashylyq basqarmasynyń basshysy Murat Musataev baıandady.
Onyń aıtýynsha, Tarbaǵataı, Borodýlıha, Aıagóz, Kókpekti aýdandarynda halyqty qajetti kómirmen qamtý kórsetkishi 8-17 paıyz aralyǵynda qalyp otyr. Oblys ákimi mundaı kórsetkish Shyǵys Qazaqstan úshin alańdarlyq jaǵdaı ekenin aıtyp, basqarmanyń jumysyn synǵa aldy.
«Qyrkúıektiń 15-inde qar túse qalsa, eldiń bári otynsyz qalýy múmkin. Men Sizderge mamyr aıynan beri eldi kómirmen qamtýǵa tapsyrma bergenmin. Úsh aı boıy arqany keńge salyp júrdińizder. Erteń aıaq astynan aıaz qysyp, eldi shýlatsa, qylar qaırandaryńyz joq. Barlyq ákimder qyrkúıektiń ortasyna deıin eldi 100 paıyz kómirmen qamtıtyn bolsyn. Bul máselede eshbir syltaý qabyldanbaıdy. Óıtkeni, qajetti qarajat bıýdjetke mamyr aıynda salynyp qoıǵan» - dedi Danıal Ahmetov.
Al kómir baǵasyna qatysty bylyqty retke keltirý tabıǵı monopolııany retteý jáne básekelestikti qorǵaý departamentine júkteldi.
«Úrjar aýdanynda kómir baǵasy shynymen 18 myń tonnaǵa jetken. Monopolııaǵa qarsy qyzmet qaıda qarap otyr? Kómir tasymaldaýmen aınalysatyn adamdardyń jumysyn memlekettik kiris departamenti qolǵa alsyn. Tasymal baǵasy kómirdiń baǵasyna áser etpeýi kerek. Osynyń bárin muqııat zerttep, oryn alǵan bylyqty retteý boıynsha usynys engizińizder» - dedi ákim.
Májiliste oblystyń keıbir aýdandarynda medıtsınalyq nysandardyń da qysqa daıyndyǵy mardymsyz ekeni málim boldy.
