Danıal Ahmetov qyzmetinen ketti
ASTANA. KAZINFORM – Týrızm jáne sport mınıstri Erbol Myrzabosynovtyń qatysýymen Qazaqstan jeńil atletıka federatsııasynyń 2024 jyldy qorytyndylaý jıyny ótti.
Atalǵan vedomstvo taratqan málimetke sáıkes, is-sharaǵa jeńil atletıka federatsııasynyń prezıdenti Danıal Ahmetov, oblystyq federatsııanyń basshylary, sportshylar men federatsııa ókilderi qatysty.
Jıynda Danıal Ahmetov federatsııanyń atqarǵan jumysy týraly esep berip, sporttaǵy birqatar mańyzdy jetistigin atap ótti. Onyń ishinde halyqaralyq jarystarda Qazaqstan atletteri kórsetken joǵary nátıjeler men jeńister, sondaı-aq jeńil atletıkanyń damýyna baǵyttalǵan jańa bastamalar aıtyldy.
Otyrysta Danıal Ahmetov qyzmetin merziminen buryn toqtatatynyn málimdep, federatsııa prezıdenttigine dańqty jeńil atlet, London Olımpıadasynyń chempıony Olga Rypakovanyń kandıdatýrasyn usyndy. Jıynǵa qatysýshylar, sonyń ishinde oblys federatsııalarynyń basshylyǵy men sport qaýymdastyǵy O.Rypakovanyń kandıdatýrasyn biraýyzdan qoldady.
Mınıstr Erbol Myrzabosynov jeńil atletıka federatsııasyn birneshe jyl basqarǵan Danıal Ahmetovke jemisti qyzmeti úshin alǵys bildirip, prezıdenttikke taǵaıyndalǵan Olga Rypakovanyń qyzmetine sáttilik tiledi.
– Jeńil atletıka – eldegi eń tanymal sport túrleriniń biri. Qazirgi tańda 360 myńnan astam otandasymyz dál osy sport túrimen kásibı túrde aınalysady. Sondyqtan biz bul sportty jańa deńgeıge kóterip, onyń halyqaralyq arenada tanymaldylyǵyn arttyrýymyz qajet. Búgingi jıynda federatsııanyń jumysyna qatysty mańyzdy ózgerister bolyp jatyr. Federatsııany birneshe jyl basqarǵan Danıal Ahmetov qyzmetinen ketip jatyr. Oǵan atqarǵan jumysy úshin alǵys bildiremin. Danıal Kenjetaıulynyń basshylyǵymen bizdiń atletter halyqaralyq jarystarda úlken jetistikterge jetti. Endi federatsııa prezıdenttigine Olımpıada chempıony Olga Rypakova kelip otyr. Olga Sergeevnanyń otandyq jeńil atletıkanyń damýyna qosqan úlesi mol. Aldaǵy ýaqytta da elimizdiń jeńil atletıka sportyn bıikterge kóteredi dep senemiz, - dep atap ótti Erbol Myrzabosynov.
Jıyn sońynda mınıstr Olga Rypakovaǵa elimizdegi jeńil atletıka sportynyń halyqaralyq deńgeıdegi yntymaqtastyǵyn arttyrý, sportshylardyń daıyndyǵyna jáne rezervti daıarlaýǵa erekshe kóńil bólý qajettigin tapsyrdy.