Danıal Ahmetov: Kásipkerler klınetterine Ashyq júıesin aldaýdy úırete bastady
Aımaq basshysy meıramhana ıelerimen onlaın-kezdesý ótkizdi. Búgingi tańda oblysta qoǵamdyq tamaqtaný oryndaryna sanıtarlyq-gıgıenalyq normalardy saqtaı otyryp, Ashyq júıesi arqyly jumys isteýge ruqsat berilgen.
«Myna qıyn ýaqytta bıznesti qoldaý úshin osyndaı sheshimge kelgen edik. Alaıda kóp uzamaı kásipkerler klıentterin arnaıy qosymsha arqyly tekserýdi toqtatty. «Qyzyl» aımaqqa ótkenimizdi elemeı, jurtqa júıeni qalaı aldaýǵa bolatynyn úırete bastady», - dedi Danıal Ahmetov.
Onyń aıtýynsha, óńirde vırýs juqtyrǵandar sany kúrt ósip ketti. Osyǵan baılanysty meıramhanalardyń janyna polıtseılerdiń kezekshilik etýine týra kelgen. Ákim kásipkerlerdi jaýapkershilikpen jumys isteýge shaqyryp, keri jaǵdaıda qyzmetteri múlde toqtatylatynyn qatań eskertti.
«Jumysty jalǵastyrý úshin Ashyq júıesi arqyly jumys istep, kelgen qonaqtardyń mártebesi shyn tekserilýi tıis. Sondaı-aq merekelik is-shara ótkizetinderi jóninde eki táýlik buryn ákimdikke eskertip, mindetteme alýlary kerek. Tek osylaı ǵana naýqas adammen baılanysta bolǵandardyń sanyn naqtylaı alamyz.
Kásipkerdiń karantın talaptaryn buzǵany jáne meıramhanaǵa kelgen qonaqtardyń jappaı vırýs juqtyrǵany anyqtalsa eń qatań shara qoldanylady. Bir aptanyń ishinde tıisti memorandým daıyndaımyz. Oǵan jumysty jalǵastyrǵysy keletin jáne qoǵam aldynda jaýapkershiligi bar kásip ıeleri qol qoıýy tıis», - dedi óńir basshysy.
