Danıal Ahmetov: Karantın jeńildetilgenimen, saqtyq sharalaryn umytpaýymyz kerek
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov karantındik shekteýler jeńildetilgenimen, saqtyq sharalaryn umytpaý qajettigin eskertti, dep habarlaıdy QazAqparat tilshisi.
«Jarty aı boıy bizdiń oblys karantındik is-sharalardyń «sary aımaǵynda» keledi. Sońǵy on bes kúnde tósek qorynyń qamtylý paıyzy 14,5-ten 11,3% deıin tómendedi. Óńirimizdiń árbir turǵynynyń azamattyq jaýapkershiligi jáne kásipkerlerdiń sanıtarlyq talaptardy saqtaýdaǵy kúsh-jigeri oblys aýmaǵynda turaqty jaǵdaıdyń saqtalýyna zor úmit beredi», - dep jazdy Danıal Ahmetov Facebook-paraqshasynda.
Onyń aıtýynsha, búginde ShQO-da shaǵyn jáne orta bıznes ádettegi jumys qalpyna qaıta kóshýde. Aldaǵy mereke kúnderi kásipkerlerdiń shtattyq rejımde jumys isteýine de múmkindik berilip otyr.
«Osylaısha, oblys aýmaǵynda ornalasqan azyq-túlik jáne azyq-túlik emes taýarlardyń saýda obektilerine, ıaǵnı bazarlarǵa, sondaı-aq sýper jáne gıpermarketterge, saýda úılerine, saýda-oıyn ortalyqtaryna mereke kúnderi (16-19 jeltoqsan aralyǵynda) jumys isteýge ruqsat berildi. Árıne, barlyq sanıtarlyq talaptar saqtalýy tıis. Demalystan (jeksenbiden) basqa kúnderi sport nysandary, muz aıdyndary, monshalar, basseınder men SPA-ortalyqtary aldyn ala jazylý boıynsha jumys isteıdi. Sondaı-aq balalardy ońaltý jáne bilim berý ortalyqtary, mádenıet obektileri, kitaphanalar, murajaılar, bıznes-ortalyqtar jáne sulýlyq salondary ShQO Bas sanıtary mindetin atqarýshynyń qaýlysynda belgilengen shekteýlerge sáıkes qyzmetin júzege asyrady», - dedi aımaq basshysy.
Danıal Ahmetovtyń sózinshe, dárigerler kóp adam jınalýy yqtımal kez kelgen sharadan bas tartýdy usynýda. Sondyqtan qoǵamdyq tamaqtaný oryndarynda jappaı, otbasylyq, ujymdyq merekeler ótkizýge ruqsat joq.
«Sondaı-aq balalar oıyn alańdary men attraktsıondardyń qyzmetine tyıym salyndy. Barlyq kásiporyndar árbir qyzmet salasy úshin belgilengen sanıtarlyq-epıdemıologııalyq talaptardy qatań saqtaýy tıis. Bizdiń basty mindetimiz – karantındik shekteýler jeńildetilgenmen saqtyq sharalaryn umytpaı, indettiń qaıta órshýine jol bermeý», - dedi oblys ákimi.
