Danıal Ahmetov «Halıfa Altaı» meshitindegi Islam mádenıeti murajaıymen tanysty

ÓSKEMEN. QazAqparat - Musylmandar úshin qasıetti Ramazan aıynda Shyǵys Qazaqstan oblysynyń ákimi Danıal Ahmetov oblystyq «Halıfa Altaı» meshitinde boldy, dep habarlaıdy QazAqparat oblys ákiminiń baspasóóz qyzmetine silteme jasap.

Óńir basshysy jaqyn arada meshit aýmaǵynda ornalasatyn ıslam mádenıeti murajaıynyń qurylym tujyrymdamasymen tanysty.

«Islam mádenıeti murajaıynda Qazaqstanda Islam dininiń paıda bolýy men damý tarıhy úsh bólikpen kórsetiletin bolady: táńirshildik, Qazaqstan jerinde ıslamnyń paıda bolýy men taralýy, Islamnyń qazirgi dáýiri. Bul jerge ıslamǵa deıingi kezeńdegi Kúltegin (Kúltegin tas stellasy (VIII ǵasyr) - ejelgi túrki órkenıetiniń eskertkishi. Qolbasshy Kúlteginniń qurmetine ornatylǵan jáne Saq dáýiriniń arheologııalyq jádigerler, balbal tastar, tasqa basylǵan tańbaly sýretterdiń úlgileri qoıylatyn bolady. Sonymen qatar Qazaqstan damýynyń ártúrli kezeńderindegi kıim úlgileri men qorda sırek kezedesetin 100 jáne 200 jyldyq tarıhy bar kitaptar, Qasıetti Qaǵba jáne Qazaqstan meshitteriniń maketteri kórsetiledi», delingen habarlamada.
Murajaıdyń dál ortasynda ıntaraktıvti rejimde oqýǵa bolatyn, qazaq, orys jáne arab tilderindegi elektrondy Quran ornalasady. Barlyq qosymsha eksponattar elektrondy túrde beriledi. Planshet arqyly, árbir nysan týraly tolyq aqparat alýǵa múmkindik qarastyrylǵan. Murajaıǵa qoıylatyn eksponattar kelip kórýshilerge Islam mádenıeti tarıhy men onyń Qazaqstanda damýy jaıly kóbirek málimet alýyna múmkindik beredi. Erekshe atap óterlik jaıt, sırek kezdestetin bul jádigerler tek qana Shyǵys Qazaqstannyń muraıjalyq jınaqtamasynan ǵana emes, Túrkistan oblysy, Shymkent qalasy sııaqty respýblıkamyzdyń basqa aımaqtarynan da ákelinedi.

Qazirgi ýaqytta eksponattardy jınaý jumystary júrgizilýde, sırek kezdesetin 100 jáne 200 jyldyq tarıhy bar kitaptar qory jınaqtalǵan.
Islam mádenıeti týraly aqparat alýdyń zamanaýı ádisteri men kóne eksponattardyń biregeı úılesimi, aldaǵy ýaqytta elimizdiń barlyq turǵyndary men óńir qonaqtary arasynda respýblıkada teńdesi joq bolashaq mýzeıge degen suranysty qamtamasyz etedi.
Danıal Ahmetov murajaıdy uıymdastyrý máseleleri boıynsha qosymsha tapsyrmalar berdi.
Qasıetti Ramazan aıynda oblys ákimi «aýyzashar» dastarhanyn jaıyp, oǵan din jáne etnomádenı ortalyqtardyń ókilderi, aqsaqaldar men meshit jamaǵaty qatysty. Onyń barysynda óńir basshysy Shyǵys Qazaqstannyń barlyq turǵyndaryna jaqsylyq, rýhanı tazarý, beıbitshilik pen kelisim tiledi.