Danıal Ahmetov Glýbokoe kentiniń sý astynda qalý sebebin atady
ÓSKEMEN. QazAqparat - Shyǵys Qazaqstan oblysynyń basshysy Danıal Ahmetov ákimdik májilisinde Beloýsovka kentindegi bógettiń sý rettegishi bolmaǵandyqtan, Glýbokoe kenti sý astynda qalǵanyn málimdedi, dep habarlaıdy QazAqparat tilshisi.
Oblys boıynsha tasqynnyń aldyn alýǵa baǵyttalǵan is-sharalardyń 2017-2020 jyldarǵa arnalǵan keshendi baǵdarlamasyn talqylaý barysynda keıbir tótenshe jaǵdaılar salǵyrttyqtan bolǵany aıtyldy. Tótenshe jaǵdaılar departamentiniń basshysy Nurlan Madııarov bıylǵy jaǵdaıdan keıin tasqyn qaýpi bar ýcheskeler tizimine taǵy 20 nysan qosylǵanyn aıtty. Danıal Ahmetov tasqynnyń aldyn alýǵa bıyldyń ózinde 500 mln teńge bólinetinin aıta kele, arnaıy komıssııa 2 aıdyń ishinde qalyptasqan jaǵdaılarǵa tereń taldaý jasaıtynyn jetkizdi. Eki aıdyń ishinde ketken kemshilikter men qolǵa alynýy tıis sharalar naqtylanady. Mysaly, Beloýsovkadaǵy dambynyń sý rettegishi joq bolǵandyqtan, Glýboke kenti qarǵyn sýdyń ortasynda qalǵan. Al quzyrly organ ókilderi men aýdan ákimdigi muny eskermegen. Bul keshendi baǵdarlama túgeldeı oblys bıýdjetinen qarjylandyrylatyndyqtan, óz talǵamymyz boıynsha qaıta jasaımyz. Onyń ishine Beloýsovka kentindegi bógetke sý rettegish ornatý, Semeı qalasyndaǵy Túıemoınaq aralynyń jan-jaǵyn bıiktetý sııaqty naqty sharalar enýi tıis» - dedi ákim.
Bıylǵy tasqynnyń údeýine muz keptelisteriniń de sebepker bolǵany aıtyldy. Qatelik qaıtalanbas úshin ózen-kólderdiń betindegi muzdyń qalyńdyǵyn qadaǵalaıtyn monıtorıng jumystaryn jetildirip, keptelisterdi aldyn ala boljaý júıesin qurý usynyldy.
«Ertistiń betine qatqan muz da eldi kóp áýrege saldy. Bıylǵydaı muz jarý jumystaryn keptelis bolǵan kezde ǵana júrgizbeı, aldyn ala uıymdastyrý qajet. Dál osyndaı sharalar Zyrıan, Shemonaıha, Qatonqaraǵaı, Besqaraǵaı aýdandarynda da qolǵa alynsyn», - dedi Danıal Ahmetov.
Aıta keteıik, Glýbokoe aýdanyndaǵy bógettiń qaraýsyz qalýyna baılanysty aýdandyq prokýratýra tekserý júrgizip jatyr.
