Danıal Ahmetov: El aýyldan údere kóshýde, biz qarap otyrmyz
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov óńirde eńbek mıgratsııasyn retteý jáne oralmandardy qabyldaý jumystary salǵyrt júrip jatqanyn synǵa aldy, dep habarlaıdy QazAqparat tilshisi.
Bul másele búgin oblys ákimdiginiń kezekti májilisinde talqylandy. «Ónimdi jumyspen qamtý-2020» baǵdarlamasynyń aıasynda Shyǵys Qazaqstanǵa bıyl 714 otbasy kóship kelýi tıis. Atalmysh kvotanyń 364-i Túrkistan, Qyzylorda, Mańǵystaý, Almaty oblystarynan qonys aýdarýshylarǵa bólinse, qalǵan 350-i sheteldik qandastardyń otbasylaryna arnalǵan. Segiz aıdyń ishinde atalmysh kvota 36,2 paıyzǵa ǵana oryndalǵan. Oblystyq jumyspen qamtý jáne áleýmettik baǵdarlamalardy retteý basqarmasynyń basshysy Elena Starenkova qonys aýdarýshylardy qabyldaýǵa jaýapty aýdandardyń sylbyrlyǵy kóshti tejep tur degen pikir bildirdi.
«Ásirese, Semeı jáne Kýrchatov qalalary, Abaı, Aıagóz, Zaısan, Kókpekti, Kúrshim, Tarbaǵataı, Úrjar aýdandary belgilengen kvotany ıgermeı otyr» - dedi Elena Starenkova.
Danıal Ahmetov basqarma basshysyna atalmysh máselege muqııat bolýdy tapsyrdy.
«Áýeli Sizdiń ózińizge jumys tásilin ózgertý kerek. Bólingen kvotanyń naqty qandaı aýyldyq okrýgke berilgenin bilmeı otyrsyz. Jumysqa bulaı salǵyrt qaraýǵa bolmaıdy. Kóshi-qon degenińiz - memlekettik másele. Bizdiń Katonqaraǵaı aýdanynda jyl saıyn halyq azaıyp barady. Al Sizder bólingen kvotanyń ózin ıgere almaı otyrsyzdar. Aýyldy damytýǵa bólingen 3,5 mlrd teńgeniń nesıesin 30 paıyz ǵana ıgergensizder. Áıteýir ıgere almaıdy ekensizder, sol aqshany kóship keletin otbasylarǵa baǵyttańyzdar. Onsyz da el aýyldan údere kóshýde. Al biz qol qýsyryp, qarap otyrmyz. Atalmysh kvota Glýbokoe, Shemonaıha, Zyrıan aýdandary men Rıdder qalasynda kóptep bólinýi tıis. Nemquraılylyqty qoıyp, osy baǵytta jumys isteńiz» - dedi aımaq basshysy.
Keri ketken kóshti durys arnaǵa burý úshin endi ár aýdandaǵy bos úılerdiń tizimi jasalyp, ony memleket menshigine satyp alý jáne jóndeý jumystary uıymdastyrylmaq. Sodan keıin ǵana ár aýdanǵa bos úılerdiń sanyna baılanysty kvota bólinetin bolady. Al kóship kelgen otbasylardy jumyspen qamtý úshin memlekettik jer qorynan egindik pen jaıylym telimderi bólinedi. Shaǵyn nesıe arqyly mal satyp alýǵa da jol ashylmaq.
«Shetelden qandastardy shaqyrý jetkiliksiz. Shaqyrǵan ekenbiz, durys jaǵdaı jasalýy tıis. Turatyn baspanasy, bala-shaǵasyn asyraıtyn kásibi, jaıylym men egindik jeri bolýy tıis. Al ózge óńirlerden keletin otbasylardy kóshirip alý úshin Tarbaǵataı aýdanynyń tájirıbesin paıdalanýǵa bolady. Kóship keletin januıanyń árqaısymen jeke tansyp, jumys isteýge nıeti bar adamdardy birinshi kezekte ákelý qajet» - dedi Danıal Ahmetov.
